Ahmataj pas humbjes ndaj Teutës: “Po shohim çudira! Na ndalin me faulle që nuk ndëshkohen”

Julian Ahmataj nuk e fsheh pakënaqësinë pas humbjes 2-0 të Skënderbeut përballë Teutës në “Niko Dovana”, në javën e gjashtë të “Abissnet Superiore”. Në prononcimin për emisionin “Super Gol”, trajneri i korçarëve ngriti pretendime për mënyrën e ndëshkimit të kundërshtarëve, ndërsa mbrojti paraqitjet e skuadrës së tij.

Sipas Ahmatajt, ritmi i lartë i futbollistëve të Skënderbeut po i detyron kundërshtarët të përdorin faulle për t’i ndalur. Ai pretendon se ndëshkimet po vijnë me vonesë.

“Të gjitha skuadrat që kanë luajtur kundër nesh kanë marrë karton të kuq. Kjo do të thotë që janë kursyer për të mos marrë kartona dhe i marrin në fund”, deklaroi tekniku.

Ahmataj pranoi se rezultatet kanë munguar, por këmbënguli se skuadra po tregon ritëm dhe po u krijon vështirësi rivalëve.

“Rezultatet kanë munguar, është e vërtetë, por nuk na përballojnë dot dhe mundohen me faulle që nuk ndëshkohen. Po shohim çudira”, u shpreh ai.

Në analizën taktike, trajneri theksoi se ndryshimi i sistemeve gjatë ndeshjes është pjesë e futbollit të sotëm. Sipas tij, skuadrat përdorin disa mënyra organizimi brenda së njëjtës përballje, duke kërkuar përshtatje të vazhdueshme nga lojtarët.

Për ecurinë e Skënderbeut, Ahmataj kërkoi kohë dhe besim. Ai kujtoi se bëhet fjalë për një skuadër të re, që do të përballej me vështirësi në fillim të kampionatit. Ndeshjet në transfertë, sipas tij, e kanë rënduar këtë periudhë.

Si argument për potencialin e grupit, tekniku përmendi paraqitjen në shtëpi, ku, sipas vlerësimit të tij, korçarët dominuan dhe krijuan shumë raste.

“Kjo është çështje kohe, momenti dhe besimi, që do të vijë gradualisht duke kaluar ndeshjet”, theksoi Ahmataj.

Pavarësisht humbjes, trajneri nuk e konsideron të pakapërcyeshme diferencën në renditje. Ai vuri në dukje se java e gjashtë ende nuk ishte përfunduar dhe se, duke përjashtuar tri skuadrat e para, diferencat mes ekipeve ishin vetëm 3-4 pikë.

Skënderbeu kërkon kthesën, ndërsa Ahmataj vazhdon të besojë te grupi. Tashmë, sfida e korçarëve është ta shndërrojnë ritmin dhe rastet e krijuara në pikë.