Amorim jep miratimin për largimin e Leaos, Milani ul çmimin

Orë vendimtare për Milanin dhe yllin e skuadrës, Rafael Leao. Pas deklaratave të portugezit në fillim të verës dhe përpjekjeve të klubit për të rindërtuar marrëdhënien me të, aventura e numrit 10 me fanellën kuqezi duket gjithnjë e më pranë fundit.

Sipas raportimeve të Sky Sport, trajneri Rúben Amorim ka dhënë miratimin për shitjen e sulmuesit. Gjatë takimit të rëndësishëm të zhvilluar me Gerry Cardinale, tekniku portugez ka bërë të ditur se, pas një muaji pune me skuadrën, nuk do ta kundërshtonte largimin e Leaos.

Mes trajnerit dhe futbollistit nuk raportohet të ketë ndonjë përplasje. Amorim është i gatshëm ta mbajë bashkatdhetarin e tij dhe t’i japë hapësira në formacion, nëse transferimi nuk realizohet. Megjithatë, drejtuesit dhe stafi teknik duket se janë të bashkuar në idenë se shitja e tij do të ishte zgjidhja më e përshtatshme.

Aktualisht, Leao është i dëmtuar dhe rrezikon të mungojë edhe në ndeshjen hapëse të Serie A kundër Torinos. Ai nuk është grumbulluar për miqësoren e ardhshme që Milani do të zhvillojë kundër Manchester Unitedit.

Futbollisti nuk ka arritur t’ia ndryshojë mendimin trajnerit të ri dhe Cardinale tani duhet të gjejë një klub të interesuar për shërbimet e tij. Krahas Leaos, në listën e lojtarëve që mund të largohen nga Milani përfshihen edhe Fikayo Tomori, Youssouf Fofana dhe Christopher Nkunku.

Misioni për shitjen e portugezit nuk pritet të jetë i thjeshtë, por drejtuesit kuqezinj kanë nisur punën. Raportohet se është zhvilluar një takim i parë me përfaqësuesit e Leaos, gjatë të cilit Milani ka shprehur gatishmërinë për ta ulur ndjeshëm çmimin.

Klubi italian kërkonte fillimisht rreth 50 milionë euro për kartonin e 27-vjeçarit. Tashmë, një ofertë prej 40 milionë eurosh, ose maksimumi 45 milionë, mund të jetë e mjaftueshme për të mbyllur transferimin.

Pas disa sezonesh me ulje-ngritje, e ardhmja e Rafael Leaos pritet të jetë një prej temave më të nxehta të ditëve të fundit të merkatos. Milani është gati ta dëgjojë ofertën e duhur, ndërsa numri 10 kuqezi duket gjithnjë e më pranë lamtumirës.