Crystal Palace Shpallet Kampion i UEFA Conference League Pas Golit Vendimtar të Mateta ndaj Rayo Vallecano

Crystal Palace 1-0 Rayo Vallecano

E mërkurë, 27 maj 2026 – Leipzig

Crystal Palace shkroi historinë të mërkurën në mbrëmje pasi mposhti Rayo Vallecano me rezultatin 1-0 në finalen e UEFA Conference League, duke fituar trofeun e parë europian në historinë e klubit.

Një gol vendimtar në pjesën e dytë nga Jean-Philippe Mateta rezultoi i mjaftueshëm për “Eagles”, në një përballje të fortë dhe emocionuese në Leipzig, teksa skuadra e drejtuar nga Oliver Glasner përfundoi në mënyrë perfekte aventurën e saj historike europiane në sezonin e parë në një kompeticion madhor të UEFA-s.

Pjesa e parë ishte një betejë taktike, me Rayo Vallecanon që ushtroi presion të vazhdueshëm dhe i vuri londinezët në vështirësi. Skuadra spanjolle iu afrua golit në mesin e pjesës së parë, kur Alemão devijoi ngushtë jashtë portës një krosim të rrezikshëm të Pep Chavarria. Pak minuta më vonë, Unai López goditi pranë shtyllës pas një pasimi të Álvaro García në hyrje të zonës.

Crystal Palace e pati të vështirë të krijonte raste të pastra në fillim, megjithëse Tyrick Mitchell iu afrua golit para pushimit, duke goditur me kokë pas një krosimi të Adam Wharton, por pa arritur të shqetësonte portierin kundërshtar.

Goli vendimtar erdhi menjëherë pas fillimit të pjesës së dytë. Mesfushori Adam Wharton avancoi me topin dhe provoi një goditje të fortë nga distanca. Portieri i Rayo-s, Augusto Batalla, arriti ta ndalte goditjen, por Mateta reagoi më shpejt se të gjithë dhe shtyu topin në rrjetë nga afër, duke shpërthyer festën e tifozëve të Palace.

Crystal Palace ishte shumë pranë golit të dytë disa minuta më vonë, kur një goditje dënimi e Yeremy Pino preku të dyja shtyllat, por askush nuk arriti të realizonte në rikthim. Batalla më pas bëri një tjetër pritje vendimtare ndaj Mateta në një rast ballë për ballë.

Rayo Vallecano nuk u dorëzua dhe shtyu fort në minutat e fundit. Skuadra e Iñigo Pérez e mbajti Palace nën presion konstant dhe krijoi momente paniku në zonën angleze, por goditjet e sakta munguan. Rasti i fundit erdhi në sekondat përmbyllëse, kur Alemão goditi jashtë kuadratit, duke vulosur triumfin historik të Crystal Palace.

Paraqitja fantastike e Wharton në mesfushë i siguroi atij çmimin “Lojtari i Ndeshjes”. Paneli teknik i UEFA-s vlerësoi mesfushorin për krijimin e golit dhe kontrollin e lojës në një duel shumë të fortë në mesin e fushës.

Pas ndeshjes, autori i golit, Mateta, nuk e fshehu emocionin:

“Ndihem fantastik! Hera e parë në Europë dhe ia dolëm. Dhamë gjithçka dhe për këtë arsye fituam sot.”

Edhe Wharton foli për emocionet e mëdha që kjo fitore solli për klubin dhe tifozët:

“Nuk mund ta përshkruaj me fjalë këtë ndjesi. Mund ta shihni çfarë do të thotë kjo për jugun e Londrës dhe për tifozët.”

Kjo fitore përfaqëson një tjetër sukses të jashtëzakonshëm për trajnerin Oliver Glasner, i cili sezonin e kaluar i dhuroi klubit FA Cup, ndërsa tani edhe lavdinë europiane.

Për Rayo Vallecanon, humbja ishte e dhimbshme, por sezoni historik në Europë mbetet një arritje krenarie për klubin dhe tifozët e tij. Trajneri Iñigo Pérez përgëzoi skuadrën për guximin dhe shpirtin luftarak të treguar gjatë gjithë finales.

Me këtë sukses, Crystal Palace bëhet klubi i tretë anglez që fiton UEFA Conference League, pas West Ham United dhe Chelsea, ndërsa gjithashtu hyn në listën e 12 klubeve angleze që kanë fituar një kompeticion madhor europian.

Një natë historike për Crystal Palace përfundoi me ngritjen e trofeut të Conference League në qiellin e Leipzigut — një moment që tifozët e “Eagles” do ta kujtojnë përgjithmonë. Line-ups Crystal Palace: Henderson; Canvot, Lacroix, Riad; Muñoz, Wharton, Kamada, Mitchell; Sarr, Mateta (Strand Larsen 76), Pino (Guessand 80)

Rayo Vallecano: Batalla; Rațiu, Lejeune, Ciss, Chavarría; Isi Palazón (Akhomach 77), Óscar Valentín (Mendy 62), López (Díaz 62); De Frutos (Camello 70), Alemão, García (Espino 70)