Daku shënon, por Rubin Kazani e nis sezonin me humbje

Mirlind Daku e ka nisur sezonin e ri në Premier Ligën e Rusisë me gol, por realizimi i sulmuesit shqiptar nuk mjaftoi për t’i siguruar Rubin Kazanit një rezultat pozitiv.

Në ndeshjen hapëse të sezonit 2026–2027 kundër Krasnodarit, Daku e kaloi skuadrën e tij në avantazh që në minutën e 12-të.

Sulmuesi kuqezi shfrytëzoi asistimin e portierit Yevgeni Staver dhe e dërgoi topin në rrjetë, duke i dhënë Rubin Kazanit epërsinë 1-0.

Megjithatë, rrjedha e takimit ndryshoi vetëm gjashtë minuta më vonë. Ilya Rozhkov u ndëshkua me karton të kuq në minutën e 18-të, pas rishikimit të aksionit nga VAR-i.

Rubin Kazani u detyrua të luante me dhjetë futbollistë për më shumë se 70 minuta dhe nuk arriti ta ruante avantazhin.

Krasnodari barazoi në minutën e gjashtë shtesë të pjesës së parë me anë të Juan Bosellit. Nikita Krivtsov përmbysi rezultatin në minutën e 53-të, ndërsa Christian Ramírez vulosi fitoren 3-1 në minutën e katërt shtesë.

Pavarësisht humbjes së skuadrës së tij, Daku zhvilloi një paraqitje pozitive. Ai luajti gjatë gjithë ndeshjes, realizoi një gol dhe regjistroi tri goditje në portë.

Goli në javën e parë është një sinjal premtues për sulmuesin e Kombëtares shqiptare, i cili e nis sezonin e ri me synimin për të qenë përsëri një nga protagonistët kryesorë të Rubin Kazanit.