Drita ndez dritat në fund dhe kualifikohet, shorti ia bën rrugën “dritë”

Drita ka siguruar kualifikimin në raundin e tretë eliminator të UEFA Conference League, pasi mposhti 2-1 Floriana FC pas kohës shtesë.

Skuadra kosovare triumfoi me rezultatin e përgjithshëm 3-2, në një mbrëmje plot emocione në stadiumin “Fadil Vokrri”.

Mysafirët kaluan të parët në avantazh me golin e Paul Mbong në minutën e 40-të, duke e vendosur Dritën nën presion.

Skuadra gjilanase krijoi disa mundësi, por vuajti përpara portës kundërshtare dhe nuk arriti t’i konkretizonte rastet.

Kur eliminimi dukej shumë pranë, Jorgo Pëllumbi ndezi “dritat” në Prishtinë, duke barazuar rezultatin në minutën e 88-të.

Goli i tij e dërgoi takimin në kohën shtesë dhe i dha Dritës moralin e nevojshëm për ta përmbysur plotësisht sfidën.

Vetëm pak çaste pas fillimit të kohës shtesë, presioni i vendasve shkaktoi autogolin e Kauan, që vulosi fitoren 2-1 dhe kualifikimin e Dritës.

Trajneri i Dritës, Zekirija Ramadani, pranoi se ndeshja u bë e vështirë për shkak të rasteve të humbura në fillim.

“Kur e nis ndeshjen me raste dhe nuk shënon, atëherë gjithçka bëhet më e vështirë. Goli i kundërshtarit erdhi më shumë nga stresi dhe nervozizmi ynë sesa nga cilësia e tij”, deklaroi Ramadani.

Ndryshimet nga stoli rezultuan vendimtare, ndërsa Manaj dhe Huka dhanë një kontribut të rëndësishëm në përmbysjen e madhe.

“Duhej të mendonim edhe për kohën shtesë. Nuk mund ta përdornim të gjithë potencialin që në fillim. Lojtarët që u aktivizuan nga stoli dhanë më shumë nga vetja”, shtoi trajneri i Dritës.

Ramadani përgëzoi futbollistët për karakterin dhe falënderoi tifozët që vazhduan ta mbështesnin ekipin edhe kur ishte në disavantazh.

Kjo ishte fitorja e parë e Dritës në edicionin 2026–27, pas shtatë takimeve pa fitore, duke përfshirë edhe ndeshjet përgatitore.

Në raundin e tretë, shorti duket se ia ka bërë rrugën “dritë” skuadrës kosovare, e cila do të përballet me Tre Fiori të San Marinos.

Pas një nate besimi, karakteri dhe sakrifice, Drita vazhdon ëndrrën evropiane.