Egnatia nis mbrojtjen e titullit ndaj Tiranës, Nevil Dede përballë klubit ku shkroi historinë

Shorti i edicionit të 88-të të Abissnet Superiore ka rezervuar një supersfidë që në javën e parë të kampionatit. Egnatia, kampionia në fuqi e Shqipërisë, do të presë në "Egnatia Arena" skuadrën e Tiranës, në një duel që pritet të ndezë menjëherë garën për titull.

Por përtej rëndësisë së tre pikëve, kjo ndeshje mbart edhe një histori të veçantë. Trajneri i Egnatias, Nevil Dede, do të përballet me klubin ku ndërtoi emrin e tij si futbollist dhe ku fitoi zemrat e tifozëve bardheblu. Ish-kapiteni i Tiranës rikthehet përballë "Zonjës së Vjetër" të futbollit shqiptar, këtë herë si strateg i kampionëve në fuqi.

Egnatia hyn në sezonin e ri me objektivin e qartë për të mbrojtur titullin kampion dhe për të konfirmuar dominimin e viteve të fundit. Skuadra nga Rrogozhina, që zhvillon ndeshjet në Egnatia Arena, synon ta nisë kampionatin me fitore përballë një rivali historik.

Kalendari i fazës së parë

Sipas shortit të publikuar nga klubi, Egnatia do të ketë këtë rrugëtim në nëntë javët e para:

Java 1: Egnatia – Tirana Java 2: Vora – Egnatia Java 3: Egnatia – Skënderbeu Java 4: Elbasani – Egnatia Java 5: Egnatia – Partizani Java 6: Laçi – Egnatia Java 7: Egnatia – Vllaznia Java 8: Dinamo City – Egnatia Java 9: Egnatia – Teuta

Kalendari i kampionëve është i ngarkuar me përballje të forta. Brenda nëntë javëve të para, Egnatia do të ndeshet me katër pretendentët kryesorë për titull – Tiranën, Partizanin, Vllazninë dhe Dinamo City – çka e bën fazën e parë një provë të vërtetë force për skuadrën e Nevil Dedes.

Ndeshja hapëse ndaj Tiranës pritet të jetë një spektakël në Rrogozhinë. Kampionët kërkojnë ta nisin sezonin me një deklaratë të fortë, ndërsa Tirana synon të tregojë që në javën e parë se është gati të rikthehet në luftën për trofe.

Për Nevil Deden, sfida do të ketë edhe një ngarkesë emocionale. Ai do të jetë përballë klubit ku shkroi faqet më të rëndësishme të karrierës së tij si futbollist, por këtë herë me misionin për t'i dhënë Egnatias një tjetër nisje të suksesshme drejt mbrojtjes së kurorës së kampionit.