FC Midtjylland. Tullberg para debutimit europian: “Jemi këtu për të fituar”

Të enjten në mbrëmje, FC Midtjylland nis rrugëtimin në fazën e ligës së UEFA Conference League, përballë Egnatias, tri herë kampione e Shqipërisë, në stadiumin kombëtar në Tiranë.

Përpara stërvitjes së të mërkurës, Mike Tullberg dhe Mads Bech Sørensen u takuan me gazetarët. Trajneri vlerësoi arritjet e kundërshtarit, por njëkohësisht bëri të qarta ambiciet e Midtjyllandit.

“Para së gjithash, Egnatia meriton një urim të madh për kualifikimin për herë të parë në fazën e ligës. Ata e kanë fituar kampionatin tri vite radhazi dhe ne e respektojmë këtë arritje. Por edhe ne vijmë me ambiciet tona dhe kemi ardhur këtu për të fituar”, deklaroi Mike Tullberg.

Prej disa vitesh, FC Midtjylland ka konsoliduar praninë në skenën europiane. Paraqitja e fortë në Europa League sezonin e kaluar shtoi një tjetër kapitull në rezultatet ndërkombëtare të klubit.

“Sezonin e kaluar treguam se çfarë jemi në gjendje të bëjmë në Europë. E përfunduam fazën e ligës në vendin e tretë dhe mundëm skuadra të mëdha gjatë rrugëtimit. Kemi respekt për të gjithë kundërshtarët, por përqendrimi ynë është, mbi të gjitha, te loja jonë dhe te lojtarët tanë. Kjo nuk ndryshon, pavarësisht se kë kemi përballë”, theksoi trajneri.

Synojnë të ndërtojnë mbi suksesin e sezonit të kaluar

Për Mads Bech Sørensen, i cili u rikthye pas një mungese të gjatë për shkak të dëmtimit në fitoren e së dielës ndaj FC Copenhagen, tashmë nis një tjetër aventurë europiane.

“Duhet të jemi agresivë, të fitojmë duelet dhe të luajmë në mënyrë të drejtpërdrejtë. Kjo është qasja me të cilën do të hyjmë në ndeshje.”

“Duam të shkojmë sa më larg në këtë kompeticion, por i marrim ndeshjet një nga një. Tani rëndësi ka ta nisim mirë aventurën europiane dhe, shpresojmë, të ndërtojmë mbi atë që arritëm sezonin e kaluar”, u shpreh kapiteni.

FC Midtjylland përballet me Egnatian të enjten, në orën 18:45, në “Arena Kombëtare” të Tiranës.