Fenerbahçe përgatit ofensivën për Leaon, drejtuesit turq udhëtojnë drejt Milanos

Fenerbahçe po përgatit ofensivën për transferimin e Rafael Leaos nga Milani. Drejtuesit e klubit turk pritet të udhëtojnë drejt Milanos javën e ardhshme për të nisur negociatat zyrtare me kuqezinjtë.

E mërkura, 29 korrik, është një datë shumë e rëndësishme për Fenerbahçen. Skuadra turke do të luajë në fushën e Górnik Zabrzes për kualifikimin në fazën “play-off” të Ligës së Kampionëve, pasi e ka fituar ndeshjen e parë me rezultatin 1-0.

Mundësia për të luajtur në kompeticionin më të rëndësishëm evropian shihet si një faktor vendimtar për ta bindur Leaon të transferohet në Stamboll.

Fenerbahçe ëndërron treshen Greenwood–Muriqi–Leao

Objektivi i Fenerbahçes është krijimi i një tresheje sulmuese spektakolare me Mason Greenwood, Vedat Muriqi dhe Rafael Leao. Dy transferimet e para janë realizuar, ndërsa ylli portugez përfaqëson objektivin më të vështirë.

Agjenti Jorge Mendes po punon prej disa ditësh për të vendosur kontaktet ndërmjet klubit turk dhe Milanit. Ndërkohë, ndërmjetës të tjerë italianë po përpiqen ta bindin Leaon për projektin sportiv dhe ofertën financiare.

Fenerbahçe është gati t’i ofrojë sulmuesit një pagë që, së bashku me bonuset, mund të arrijë në 12 milionë euro në sezon.

Sipas “Calciomercato.com”, një pjesë e drejtuesve të klubit turk do të mbërrijë në Milano për të negociuar drejtpërdrejt me kuqezinjtë. Synimi i Fenerbahçes është të ulë kërkesën prej 60 milionë eurosh të Milanit.

Klubi turk ka mohuar raportimet se ka paraqitur një paketë të përgjithshme prej 100 milionë eurosh, ku përfshiheshin shuma e transferimit dhe kontrata e lojtarit.

Galatasaray ofron huazim me të drejtë blerjeje

Në garë për Leaon është futur fuqishëm edhe Galatasaray, duke krijuar një derbi të pazakontë të merkatos turke.

Kampionët e Turqisë kishin paraqitur fillimisht një ofertë verbale prej 30 milionë eurosh, por ajo u refuzua menjëherë nga Milani.

Sipas gazetarit Gianluca Di Marzio, Galatasaray ka propozuar më pas huazimin e Leaos me të drejtë blerjeje. Milani, megjithatë, vazhdon të kërkojë vetëm një transferim përfundimtar.

Tottenham gjithashtu e ka identifikuar portugezin si një përforcim të rëndësishëm për skuadrën e Roberto De Zerbit, ndërsa kampi i lojtarit vazhdon të presë oferta konkrete nga klubet e mëdha spanjolle.

Fjalën e fundit pritet ta thotë vetë Leao, i cili ende nuk ka vendosur nëse është i gatshëm ta vazhdojë karrierën në Süper Ligën turke.