Gazetat italiane: Ja merkatoja e Juventusit në 24 orët e fundit

Juventusi ka ndezur motorët në merkato dhe po punon paralelisht për disa goditje të rëndësishme, me synimin për t’i dhënë Luciano Spallettit një skuadër të aftë për të luftuar për titullin kampion.

Sipas shtypit italian, drejtuesit bardhezi kanë intensifikuar kontaktet për Joshua Zirkzee, ndërsa vazhdojnë negociatat për rikthimin e Randal Kolo Muani në Torino.

Gazzetta: Juventusi hidhet në sulm për Zirkzee

“La Gazzetta dello Sport” raporton se Juventusi ka shtuar kontaktet me përfaqësuesit e sulmuesit të Manchester United.

Drejtori sportiv Ricky Massara është një admirues i madh i holandezit dhe kishte tentuar ta rikthente në Itali edhe gjatë periudhës kur punonte te Roma.

Zirkzee e njeh shumë mirë Serie A-n, pasi më parë ka luajtur me Parmën dhe Bolognën. Pikërisht me Bolognën ai tregoi cilësitë e tij si një sulmues që merr pjesë në ndërtimin e lojës dhe krijon hapësira për shokët e skuadrës.

Drejtuesit e Juventusit po mbajnë kontakte të vazhdueshme me agjentin Kia Joorabchian për të gjetur formulën e duhur të transferimit.

Manchester United e vlerëson kartonin e sulmuesit nga 35 deri në 40 milionë euro dhe është gati të pranojë largimin e tij në formë huazimi.

Megjithatë, klubi anglez kërkon që në marrëveshje të përfshihet detyrimi i blerjes përfundimtare gjatë verës së vitit 2027.

Juventusi preferon huazimin me të drejtë blerjeje ose një detyrim që do të aktivizohej vetëm pas plotësimit të disa kushteve sportive.

Edhe paga e Zirkzee, rreth 3.6 milionë euro në sezon plus shpërblimet, konsiderohet e përballueshme për parametrat financiarë të klubit bardhezi.

Sulmuesi holandez ka dhënë sinjale pozitive për një rikthim në Itali dhe negociatat mund të përshpejtohen gjatë ditëve të ardhshme. La Gazzetta dello Sport

Dyshja e ëndrrave: Zirkzee dhe Kolo Muani

Objektivi i Juventusit nuk është vetëm Zirkzee. Klubi po përpiqet të realizojë një goditje të dyfishtë duke afruar edhe Randal Kolo Muani.

Sulmuesi francez mbetet një nga dëshirat kryesore të Spallettit, por vazhdon diferenca mes ofertës së Juventusit dhe kërkesës së Paris Saint-Germainit.

PSG kërkon rreth 50 milionë euro, ndërsa Juventusi ka ofruar afërsisht 40 milionë, duke përfshirë edhe shpërblimet.

Formula e propozuar është një huazim me blerje të kushtëzuar, e cila mund të bëhet e detyrueshme në rast të kualifikimit në kompeticionet evropiane.

Ideja e klubit është që Zirkzee dhe Kolo Muani të mos jenë alternativa të njëri-tjetrit, por të mbërrijnë së bashku në Torino për të kompletuar repartin ofensiv. La Gazzetta dello Sport

Tuttosport: Theo Hernandez i ofrohet Juventusit

Një tjetër emër i madh që është shfaqur në orbitën bardhezi është Theo Hernandez.

Sipas “Tuttosport”, mbrojtësi francez i është propozuar Juventusit dhe Napolit, duke hapur mundësinë e një rikthimi të bujshëm në Serie A.

Theo ka ruajtur një marrëdhënie të fortë me Massarën, me të cilin fitoi titullin kampion te Milani në vitin 2022.

Mbrojtësi 29-vjeçar ka kontratë me Al-Hilal deri në qershorin e vitit 2028. Në sezonin e tij të parë në Arabinë Saudite regjistroi 44 paraqitje, nëntë gola dhe gjashtë asistime.

Pengesa më e madhe mbetet paga prej rreth 20 milionë eurosh neto në sezon, shumë larg kufirit financiar të Juventusit.

Për të realizuar transferimin, Theo duhet të pranojë një ulje të ndjeshme të pagës, ndërsa si formulë mund të përdoret edhe huazimi.

Mbërritja e tij në Torino mund t’i hapë rrugën largimit të Andrea Cambiasos, për të cilin kanë shfaqur interes Barcelona, Chelsea, Interi dhe Como.

Juventusi po punon në disa fronte. Zirkzee, Kolo Muani dhe Theo Hernandez janë tre emrat që po dominojnë merkaton bardhezi në 24 orët e fundit.