Goli i Uzunit festohet edhe në Amerikë: Austin FC krenar për sulmuesin kuqezi

Goli i Myrto Uzunit ndaj San Marinos u festua edhe përtej Atlantikut. Austin FC, klubi amerikan ku luan sulmuesi shqiptar, ndau me tifozët e tij momentin e shënimit, duke e shoqëruar me një mesazh në shqip: “O sa mirë me qenë shqiptar!” Uzuni shënoi në minutën e 27-të, duke dyfishuar avantazhin e Shqipërisë në fitoren 3–0 në Serravalle. Një gol që solli gëzim te tifozët kuqezi dhe krenari te klubi i tij në Amerikë. Vëmendja e Austin FC ndaj paraqitjes së Uzunit kishte nisur përpara takimit. Klubi publikoi formacionin e Shqipërisë, duke u bërë të ditur ndjekësve se sulmuesi i tij do ta niste ndeshjen nga minuta e parë. Mesazhi që shoqëronte njoftimin ishte sërish në shqip: “Hajde shqipe!” Nga njoftimi i formacionit te festimi i golit, Austin FC e ndoqi nga afër mbrëmjen kuqezi të Uzunit. Pas ndeshjes, sulmuesi foli për gatishmërinë për t’iu përshtatur nevojave të Kombëtares. Edhe pse ndihet më natyrshëm në krahun e majtë, për të përparësi ka prania në fushë dhe kontributi për ekipin. “Kam sakrifikuar gjithmonë. Pozicioni im është nga krahu i majtë, por në Kombëtare luan ku ka nevojë ekipi. Jam gati të bëj çdo rol, vetëm që të jem në fushën e lojës”, u shpreh Uzuni. Ai shpjegoi edhe vendosjen në skemën e skuadrës, duke theksuar se eksperienca e ndihmon të përshtatet me kërkesat e trajnerit. “Mehmeti është sipër si mesfushor krahu dhe unë jam si i mesëm. E thashë: për Kombëtaren jam gjithmonë aty ku ka nevojë trajneri dhe ku ka nevojë skuadra. Kam eksperiencën e duhur. Goli më bën të lumtur, por rëndësi ka fitorja.” Uzuni pati fjalë inkurajuese edhe për debutuesin Sina. Sulmuesi vlerësoi paraqitjen e mbrojtësit dhe shpjegoi se lëvizjet përpara të lojtarit të krahut krijojnë hapësira për kombinime. “I uroj Sinës sa më shumë ndeshje. Është i ri dhe me premisa për të ecur. Presioni është aty dhe mbrojtësi i djathtë, kur ecën përpara, të jep hapësirë. Me rëndësi është që Sina luajti mirë dhe fituam. I uroj suksese”, tha ai. Një nga momentet që e mbajti në pritje ishte kontrolli i golit nga VAR-i. Uzuni tregoi se ishte i bindur për pozicionin e tij të rregullt. “E dija që nuk isha në pozicion jashtë loje”, deklaroi sulmuesi. Kur u pyet se çfarë mendonte gjatë pritjes, përgjigjja erdhi me humor: “Më mirë nuk po them se çfarë mendoj në ato momente, se jemi live…”, tha ai duke qeshur. Në një mbrëmje që shënoi ndeshjen e tij të 50-të dhe golin e shtatë me Kombëtaren, Uzuni ua kushtoi falënderimin tifozëve. “Falënderoj tifozët, sepse pa ata ne jemi askushi. I falënderoj realisht, sepse janë numri 12 dhe me ata shkojmë shumë larg.” Në Serravalle, Uzuni kontribuoi me gol. Në Amerikë, Austin FC e përshëndeti me krenari. Ndërsa mesazhi i sulmuesit mbeti i qartë: për Shqipërinë është gati të luajë aty ku nevojitet, sepse mbi kënaqësinë personale qëndron fitorja kuqezi.