Humbja ndaj Malishevës, një nga më të thellat në historinë europiane të Vllaznisë

Humbja 5-0 ndaj FC Malishevës në UEFA Conference League është një nga disfatat më të thella të KF Vllaznisë në historinë e pjesëmarrjeve të saj në kupat europiane.

Skuadra shkodrane mbërriti në ndeshjen e kthimit me avantazhin e fitores 2-1 të arritur në “Loro Boriçi”, por pësoi një kolaps të plotë, duke humbur 5-0 dhe duke u eliminuar me rezultatin e përgjithshëm 6-2.

Rezultati ndaj Malishevës renditet mes humbjeve më të rënda europiane të kuqebluve, përkrah disfatave historike ndaj Trabzonsporit, Napolit dhe Rapidit të Vjenës.

Humbja më e thellë e Vllaznisë në Europë mbetet ajo 6-0 ndaj Trabzonsporit në vitin 2007, në Kupën Intertoto.

Një tjetër disfatë shumë e rëndë është ajo ndaj Napolit. Në stadiumin “San Paolo”, sot “Diego Armando Maradona”, skuadra italiane fitoi 5-0 ndaj Vllaznisë, me dy gola të Leandro Rinaudos dhe realizimet e Piá, Ezequiel Lavezzit dhe Marek Hamšíkut. Napoli e fitoi atë përballje me rezultatin e përgjithshëm 8-0.

Vllaznia ka pësuar gjithashtu një humbje 5-0 ndaj Rapidit të Vjenës në UEFA Europa League në vitin 2009.

Disa nga humbjet më të thella të Vllaznisë në Europë: Trabzonspor 6-0 Vllaznia – 2007, Kupa Intertoto Napoli 5-0 Vllaznia – Napoli fitoi 8-0 me rezultat të përgjithshëm Rapid Vjenë 5-0 Vllaznia – 2009, UEFA Europa League FC Malisheva 5-0 Vllaznia – 2026, UEFA Conference League Vllaznia 0-4 Valur Reykjavik – 2024, UEFA Conference League Vllaznia 0-4 Trabzonspor – 2007, Kupa Intertoto Vllaznia 1-4 Galatasaray – 2001, UEFA Champions League

Disfata ndaj Malishevës bëhet edhe më e dhimbshme për shkodranët për mënyrën se si erdhi. Vllaznia kishte fituar 2-1 ndeshjen e parë dhe kishte udhëtuar me avantazh, por pësoi pesë gola pa arritur të shënonte asnjë.

Për Malishevën, triumfi 5-0 përfaqëson një nga netët më të mëdha në historinë e klubit. Për Vllazninë, ndërkohë, kjo mbrëmje do të regjistrohet mes disfatave më të rënda të historisë së saj në arenën europiane.