Ilir Daja dhe Bruno Dita optimistë para sfidës me Astanan: "Do të japim maksimumin për kualifikimin"

TIRANË – FC Dinamo City është gati për të nisur aventurën europiane. Skuadra kryeqytetase do të përballet me FC Astana në ndeshjen e parë të turit të parë kualifikues të UEFA Conference League, me objektivin për të hedhur një hap të rëndësishëm drejt fazës së ardhshme.

Në konferencën zyrtare për shtyp, trajneri Ilir Daja vlerësoi maksimalisht kundërshtarin, por theksoi se Dinamo City do të zbresë në fushë me besim dhe ambicie.

"Ne e dimë se përballë do të kemi një skuadër me shumë eksperiencë, jo vetëm në futbollin kazak, ku ka fituar disa tituj, por edhe në arenën europiane. Astana ka marrë pjesë në grupet e Champions League, Europa League dhe Conference League. Ata ndodhen në javën e 17-të të kampionatit dhe janë në ritmin maksimal të garës. Gjithashtu, trajneri i tyre punon prej disa vitesh me ekipin dhe ka krijuar një identitet të konsoliduar loje," deklaroi Daja.

Megjithatë, tekniku i Dinamos nënvizoi se këta faktorë nuk do ta ndikojnë skuadrën e tij.

"Ne do të bëjmë maksimumin tonë. Do ta respektojmë kundërshtarin, por mbi të gjitha do të respektojmë veten. Do të përpiqemi të gjejmë strategjinë më të mirë për të marrë rezultatin maksimal nga ndeshja."

Daja u ndal edhe te rëndësia e përvojës në sfida të tilla, duke u kërkuar futbollistëve më me eksperiencë të marrin më shumë përgjegjësi në fushë.

"Jam një trajner optimist dhe gjithmonë e shoh gotën gjysmë plot. Për ne është shumë pozitive që ky është sezoni i dytë radhazi që luajmë në Europë. Vitin e kaluar arritëm deri në fazën Play-off dhe kjo na ka dhënë më shumë besim."

Trajneri kujtoi gjithashtu se gara nuk përfundon pas 90 minutave të para.

"Kualifikimi vendoset pas 180 minutash. Do të mendojmë jo vetëm për të sulmuar, por edhe për të ruajtur ekuilibrin në lojë, në mënyrë që të mos i japim kundërshtarit hapësira."

Bruno Dita: "Besojmë se mund ta eliminojmë Astanën"

Optimist u shfaq edhe kapiteni Bruno Dita, i cili vlerësoi punën e bërë gjatë fazës përgatitore dhe beson se Dinamo City ka potencialin për të vazhduar rrugëtimin europian.

"Jemi optimistë sepse kemi punuar shumë gjatë fazës përgatitore. Shpresojmë të zhvillojmë një ndeshje të mirë dhe ta kalojmë Astanën."

Kapiteni kujtoi edhe suksesin e sezonit të kaluar në Europë, duke theksuar se skuadra synon të shkojë edhe më larg.

"Sezonin e kaluar patëm një ecuri shumë të mirë dhe shpresojmë që këtë vit të arrijmë sërish në Play-off, pse jo edhe në fazën e grupeve të UEFA Conference League."

Sa i përket ndryshimeve në merkato, Dita pranoi se largimet kanë qenë të rëndësishme, por shprehu besim te afrimet e reja.

"Lojtarët që janë larguar kishin shumë cilësi, por besoj se edhe futbollistët që janë afruar do të na ndihmojnë shumë gjatë këtij sezoni."

Në fund, kapiteni theksoi rëndësinë e sfidës së parë.

"Ndeshja e parë është shumë e rëndësishme dhe shpresojmë ta kalojmë me sukses."

Dinamo City do të kërkojë të shfrytëzojë faktorin fushë për të marrë një rezultat pozitiv ndaj një kundërshtari me përvojë si Astana, përpara ndeshjes së kthimit në Kazakistan. Objektivi mbetet i qartë: të hidhet hapi i parë drejt kualifikimit në turin e dytë të UEFA Conference League.