Italia në kaos: Maldini mund të tërhiqet nëse Pirlo nuk emërohet trajner

Çështja e trajnerit të ri të Kombëtares së Italisë po ndryshon nga ora në orë. Pas refuzimit të Pep Guardiolës, drejtori teknik Paolo Maldini, së bashku me këshilltarin Leonardo, ka zgjedhur Andrea Pirlon për të marrë drejtimin e “Axurrëve”, pas dështimit të tretë radhazi për t’u kualifikuar në Kupën e Botës.

Megjithatë, kur marrëveshja dukej pranë finalizimit, u shfaqën pengesat e para. Rreth Pirlos kanë shpërthyer polemika të forta për shkak të rolit të tij si ambasador global i kompanisë ruse të basteve Fonbet.

Presidenti i FIGC-së, Giovanni Malagò, ka kërkuar kohë për të vlerësuar situatën. Sipas La Gazzetta dello Sport, ai kërkon të sqarohen lidhjet e Pirlos me Fonbet dhe me oligarkun Sergey Lomakin, president i United FC.

Çfarë po ndodh?

Paolo Maldini nuk ishte përgatitur për një situatë të tillë, ku përveç çështjeve teknike janë përfshirë edhe elemente politike. Drejtori teknik rrezikon të mbajë përgjegjësi jo vetëm për rezultatet e Pirlos në fushë, por edhe për problematikat jashtë saj.

Malagò thuhet se ka shqyrtuar sërish alternativa të tjera, duke kontrolluar mundësinë e rikthimit të Antonio Contes ose Roberto Mancinit. Megjithatë, Maldini nuk është dakord me këto kandidatura.

Ai dëshiron një trajner që mund të hapë një cikël afatgjatë. Conte njihet për ndryshimet e shpeshta të skuadrave, ndërsa Mancini vazhdon të mos bindë për shkak të largimit të tij të trazuar nga Kombëtarja në vitin 2023.

A do të tërhiqet Maldini?

Është ende herët për të thënë nëse kjo situatë përfaqëson përçarjen e parë mes drejtuesve të Federatës Italiane. Megjithatë, Maldini e pranoi postin e drejtorit teknik vetëm pasi mori garancinë se do të kishte të drejtën të zgjidhte trajnerin e ri.

Për këtë arsye, nëse Pirlo nuk emërohet trajner i Italisë, nuk përjashtohet mundësia që edhe Maldini të japë dorëheqjen.

Roli vendimtar i Leonardos

Në gjithë këtë kaos, Leonardo mund të luajë një rol vendimtar. Zyrtarisht ai është këshilltar, por mund të shndërrohet në ndërmjetësin kryesor nëse situata nuk zhvillohet sipas planit të Maldinit.

Pirlo po negocion ndërprerjen e marrëdhënies së tij me United FC, me të cilin, sipas përfaqësuesve të tij, lidhet edhe roli si ambasador global i Fonbet.

Nëse Pirlo nuk bëhet trajneri i ri i Italisë, Leonardos mund t’i takojë detyra e vështirë për të ndërmjetësuar mes Maldinit, Malagòs dhe palëve të tjera të përfshira.