Italia në kërkim të trajnerit të ri, del në skenë Thiago Motta

Pas ndërprerjes së negociatave me Andrea Pirlon, të shoqëruara me polemika të forta politike dhe mediatike, Federata Italiane e Futbollit po përpiqet të rikthejë unitetin brenda projektit të ri teknik.

Objektivi i FIGC-së është që emri i trajnerit të ri të Kombëtares italiane të përcaktohet brenda së martës.

Sipas La Gazzetta dello Sport, kandidatura më e fundit dhe më konkrete është ajo e Thiago Mottës. Në këto orë po zhvillohen bisedime intensive mes drejtorit teknik Paolo Maldini dhe presidentit të FIGC-së, Giovanni Malagò.

Malagò kërkon marrëveshje me Maldinin dhe Leonardon

Malagò ua ka bërë të qartë Maldinit dhe këshilltarit Leonardo se pista që çonte te Andrea Pirlo nuk mund të vazhdonte më.

Pas këtij vendimi, Maldini dhe Leonardo kanë lënë të kuptohet se ishin të gatshëm të paraqisnin dorëheqjen. Megjithatë, presidenti i Federatës ka kundërshtuar largimin e tyre dhe ka kërkuar që të gjendet një pikë e përbashkët.

Synimi është që drejtuesit të vazhdojnë së bashku projektin për rindërtimin e Kombëtares italiane.

Maldini dhe Leonardo vendosin veton ndaj Contes dhe Mancinit

Antonio Conte dhe Roberto Mancini nuk konsiderohen alternativa të pranueshme nga Maldini dhe Leonardo.

Sipas tyre, të dy trajnerët janë shumë larg filozofisë që drejtuesit dëshirojnë të ndërtojnë te Italia. Trajneri i ri duhet të jetë plotësisht në linjë me projektin teknik dhe me idenë e një futbolli modern, sulmues dhe proaktiv.

Thiago Motta, kandidati kryesor

Në këtë kontekst ka dalë në skenë emri i Thiago Mottës. Ai është ende nën kontratë me Juventusin, por klubi bardhezi pritet të jetë i gatshëm ta lirojë, duke reduktuar njëkohësisht shpenzimet financiare.

I pyetur për mundësinë e emërimit të Mottës, Malagò nuk e mohoi pistën:

“Nuk mund të them as po, as jo.”

Bisedimet mes Malagòs dhe Maldinit vazhdojnë, ndërsa Federata shpreson të arrijë një marrëveshje që mund të zyrtarizohet brenda së martës.

Nëse palët bien dakord, Thiago Motta do të marrë drejtimin e Italisë, ndërsa Paolo Maldini dhe Leonardo do të vazhdojnë punën e tyre në krye të projektit të ri teknik të “Axurrëve”.