Football
JULIAN AHMATAJ: “NA MUNGON NJË PENALLTI, MERITONIM MË SHUMË NDAJ TIRANËS”
Trajneri i Skënderbeut, Julian Ahmataj, mbeti i pakënaqur pas barazimit 1–1 ndaj Tiranës në javën e katërt të “Abissnet Superiore”. Tekniku korçar vlerësoi paraqitjen e skuadrës së tij, por pretendoi edhe për një penallti të padhënë.
Skënderbeu dhe Tirana ndanë nga një pikë në Korçë, pas barazimit 1–1, por trajneri i bardhekuqve, Julian Ahmataj, beson se skuadra e tij meritonte të dilte fituese nga fusha.
Sipas tij, Skënderbeu zhvilloi një ndeshje me intensitet të lartë, krijoi raste dhe e mbajti Tiranën nën presion për pjesën më të madhe të takimit.
“Na vjen shumë keq që nuk e mbyllëm me fitore këtë ndeshje. Të gjithë këta tifozë prisnin fitoren nga skuadra. Loja ishte në një nivel dhe intensitet shumë të lartë dhe e detyruam kundërshtarin të qëndronte nën presion”, deklaroi Ahmataj pas ndeshjes.
Trajneri i Skënderbeut pranoi se skuadra e tij u ndëshkua në gabimin e parë, duke theksuar cilësinë që Tirana zotëron në repartin ofensiv.
“Tirana ka cilësi në vijën e parë të sulmit. Për një skuadër të re, që prezantohej për herë të parë përpara tifozëve të saj, minutat e para ishin delikate. U munduam të ishim të kujdesshëm, por pësuam. Pas atij episodi, gjithçka ishte në favorin tonë. Bëmë një paraqitje shumë të mirë dhe meritonim më shumë”, shtoi ai.
Ahmataj u ndal edhe te gjendja e fushës, e cila, sipas tij, nuk e lejoi Skënderbeun të zhvillonte një futboll më të shpejtë dhe më të pastër. Ai pranoi gjithashtu se skuadra duhet të tregohet më e saktë përpara portës.
“Duhet të shënojmë më shumë. Po e vuajmë mungesën e saktësisë përpara portës, por kam besim se golat do të vijnë”, tha tekniku korçar.
“A DUHET TË PROTESTOJMË DHE TË BËJMË SHERR?”
Pika më e fortë e reagimit të Ahmatajt lidhej me një prekje të topit me dorë në zonën e Tiranës, episod për të cilin Skënderbeu pretendoi penallti.
“Mendoj se përsëri na mungon një penallti për një prekje me dorë. Na ka ndodhur edhe në ndeshjen me Dinamon, edhe tani. Kur episodet analizohen, rezulton se penalltitë janë për ne. A duhet të protestojmë dhe të bëjmë sherr? Nuk e kam në karakter të ulëras apo të bërtas, por në katër javë kemi pasur dy raste të pastra”, deklaroi Ahmataj.
Pavarësisht zhgënjimit, trajneri shprehu besim se Skënderbeu do të përmirësohet me kalimin e javëve. Sipas tij, lojtarëve të rinj u nevojitet kohë për t’u përshtatur dhe për të krijuar automatizmat e duhur, veçanërisht në repartin e mbrojtjes.
Skënderbeu mori një pikë ndaj Tiranës, por loja e zhvilluar, rastet e krijuara dhe pretendimi për penallti lanë te bardhekuqtë ndjesinë se nga kjo ndeshje mund të kishin marrë shumë më tepër.