Jurguens Montenegro rikthehet te Egnatia: Sulmuesi kostarikan hap një kapitull të ri në Rrogozhinë

KF Egnatia ka zyrtarizuar rikthimin e sulmuesit kostarikan Jurguens Montenegro, duke forcuar ndjeshëm repartin ofensiv për sezonet e ardhshme. Futbollisti 25-vjeçar rikthehet në familjen bardhejeshile pas një periudhe të trazuar që përfundoi me largimin e tij në vitin 2024 për shkak të një mosmarrëveshjeje kontraktuale.

Montenegro, i cili mund të luajë si sulmues qendror dhe në krahun e majtë të sulmit, ka firmosur një kontratë afatgjatë deri më 30 qershor 2028. Klubi kampion i Shqipërisë e sheh rikthimin e tij si një investim të rëndësishëm për objektivat kombëtare dhe europiane.

Sulmuesi kostarikan ishte transferuar fillimisht te Egnatia në janar të vitit 2024 nga skuadra e njohur LD Alajuelense për rreth 150 mijë euro. Megjithatë, aventura e tij e parë në Rrogozhinë u ndërpre për shkak të problemeve kontraktuale. Tashmë, pas rikthimit në futbollin kostarikan dhe një periudhe të suksesshme me CS Herediano, ai është gati të nisë një kapitull të ri në Arenën Egnatia.

Në sezonin 2025/26 me Herediano, Montenegro zhvilloi 33 ndeshje, duke realizuar 3 gola dhe 3 asistime në 1,391 minuta aktivizim. Ai ka gjithashtu pesë paraqitje me Kombëtaren e Kosta Rikës dhe ka fituar dy trofe të rëndësishëm gjatë karrierës së tij: Ligën Concacaf 2020 dhe kampionatin Apertura 2020/21 me Alajuelense.

Aktualisht, vlera e tij në treg vlerësohet rreth 300 mijë euro, dyfish më e lartë se shuma me të cilën Egnatia e transferoi për herë të parë.

Me një skuadër ku afro 70 për qind e lojtarëve janë të huaj dhe me ambicie të mëdha në garat europiane, Egnatia beson se Montenegro do të jetë një nga armët kryesore në sulm së bashku me Mario Gjatën dhe Lorougnon Doukouo.

Rikthimi i Jurguens Montenegro konsiderohet një nga lëvizjet më interesante të merkatos verore në Abissnet Superiore, ndërsa tifozët e Egnatias shpresojnë që sulmuesi kostarikan të lërë pas problemet e së kaluarës dhe të ndihmojë klubin në arritjen e objektivave të rinj.