Lazio, shpërthen Gattuso pas refuzimit të Ivanović: “Këtu duhet të vijnë vetëm lojtarët që kanë dëshirë”

Gennaro Gattuso ka komentuar me tone të ashpra dështimin e transferimit të Franjo Ivanović te Lazio.

Klubi kryeqytetas kishte punuar prej kohësh për sulmuesin kroat dhe kishte arritur marrëveshjen me Benficën, por lojtari vendosi të pranonte ofertën e Lensit.

Skuadra franceze, e cila do të marrë pjesë në Champions League, arriti ta bindte 22-vjeçarin që ta vazhdonte karrierën në Ligue 1.

Duke folur në konferencën për shtyp pas ndeshjes miqësore kundër Frosinones, Gattuso zbuloi prapaskenat e marrëveshjes së dështuar.

“Klubi bëri gjithçka për ta marrë. Fola edhe unë me lojtarin dhe Benfica kishte dhënë miratimin, por ai zgjodhi Lensin për të luajtur në Champions League. Çfarë mund të bëjmë? Asgjë”, deklaroi trajneri i Lazios.

Sipas raportimeve nga Italia, Lazio kishte propozuar një huazim me të drejtë blerjeje, e cila do të shndërrohej në detyrim nëse plotësoheshin disa kushte sportive.

Megjithatë, ndërhyrja e Lensit në orët e fundit ndryshoi gjithçka. Mundësia për të luajtur në kompeticionin më prestigjioz evropian rezultoi vendimtare në zgjedhjen e Ivanovićit.

Gattuso e bëri të qartë se nuk dëshiron në skuadër futbollistë që duhet të binden për të pranuar projektin e Lazios.

“Këtu duhet të vijnë njerëz që kanë vërtet dëshirë të jenë pjesë e Lazios. Unë nuk jam mësuar t’i bind lojtarët. Në futboll nuk mund t’i premtosh asgjë askujt.”

Ish-trajneri i Kombëtares italiane kërkoi gjithashtu përkushtim dhe shpirt sakrifice nga çdo futbollist që do t’i bashkohet skuadrës bardhekaltër.

“Nëse dikush dëshiron të vijë, duhet të vendosë helmetën dhe të jetë gati për betejë, sepse pikërisht për këtë kemi nevojë këtë sezon. Përndryshe, është e kotë.”

Pas refuzimit të Ivanovićit, drejtori sportiv Angelo Fabiani duhet të përqendrohet te alternativa të tjera për repartin ofensiv.

Santiago Giménez i Milanit mbetet objektivi kryesor dhe “ëndrra” e Gattusos, por kuqezinjtë ende nuk e kanë pranuar formulën e huazimit të kërkuar nga presidenti Claudio Lotito.

Andrea Pinamonti është një tjetër mundësi konkrete. Sulmuesi i Sassuolos raportohet se ka shprehur gatishmëri për t’u transferuar në kryeqytet.

Në listën e Lazios ndodhet edhe Roberto Piccoli i Fiorentinës, i cili mund të shndërrohet në një alternativë të vlefshme gjatë ditëve të fundit të merkatos.

Mesazhi i Gattusos është i prerë: te Lazio do të mbërrijnë vetëm lojtarë të motivuar, të gatshëm të luftojnë dhe ta përqafojnë pa hezitim projektin e ri bardhekaltër.