Leao i ka mbetur Milanit “në derë”, kuqezinjtë duan ta bëjnë shok skuadre me Vedat Muriqin

Misioni i ri i Gerry Cardinale në Milano ka disa objektiva të rëndësishëm, por njëri prej tyre është më urgjent se të tjerët: zgjidhja e së ardhmes së Rafael Leaos.

Pas afrimeve të Gonçalo Ramos dhe Mario Gilas, për të cilët Milani ka shpenzuar rreth 100 milionë euro, trajneri Rubén Amorim kërkon përforcime të tjera. Megjithatë, merkatoja kuqezi mbetet e bllokuar nga situata e sulmuesit portugez.

Me pak fjalë, Leao i ka mbetur Milanit “në derë”.

Të gjithë duan ndarjen, por mungojnë ofertat

Leao po shijon ditët e fundit të pushimeve pas eliminimit të Portugalisë nga Kupa e Botës. Futbollisti e ka shprehur prej muajsh dëshirën për t’i dhënë fund aventurës së tij në Itali dhe për të provuar një kampionat të ri, pas shtatë vitesh me fanellën kuqezi.

Edhe Milani mendon se ka ardhur momenti për ndarje. Arsyet lidhen me aspektin tekniko-taktik, motivimin e lojtarit dhe pagën e tij të lartë. Leao është futbollisti më i paguar i skuadrës, me rreth shtatë milionë euro në sezon, përfshirë bonuset.

Problemi është se, deri tani, nuk ka mbërritur oferta që mund t’i kënaqë të gjitha palët.

Anglia hesht, Turqia troket në derë

Sulmuesi portugez kishte shpresuar të transferohej në Spanjë ose, mbi të gjitha, në Premier League. Aston Villa dhe Tottenham janë përmendur si klube të interesuara, por kontaktet nuk janë shndërruar në negociata konkrete.

Interesimi më serioz ka ardhur nga Turqia. Galatasaray dhe Fenerbahçe e kanë vendosur Leaon në listën e objektivave të merkatos, duke i ofruar një pagë që mund të kalojë shifrën e dhjetë milionë eurove në sezon.

Megjithatë, deri tani, kampionati turk nuk duket se është destinacioni i preferuar i portugezit.

Milani kërkon 60 milionë euro

Kuqezinjtë synojnë ta shesin Leaon për rreth 60 milionë euro. Vlera e tij aktuale në bilancin e klubit llogaritet në vetëm 16.8 milionë euro, ndaj një transferim me këtë shumë do t’i siguronte Milanit një fitim të konsiderueshëm financiar.

Paratë e përfituara nga shitja e tij do të përdoreshin për të plotësuar kërkesat e Rubén Amorimit, i cili dëshiron një fantazist të ri mëngjarash.

Nëse situata vazhdon të mbetet e bllokuar, Milani mund të pranojë edhe një huazim të kushtueshëm, me detyrim blerjeje të kushtëzuar.

Fenerbahçe kërkon ta bashkojë me Vedat Muriqin

Sipas raportimeve të fundit, një delegacion i Fenerbahçes pritet të udhëtojë drejt Milanos për t’u takuar me përfaqësuesin ligjor të Leaos. Klubi turk është gati t’i ofrojë portugezit rreth dhjetë milionë euro në sezon.

Fenerbahçe ka investuar tashmë më shumë se 60 milionë euro gjatë kësaj vere, duke afruar Nathan Aké, Mason Greenwood dhe sulmuesin e Kosovës, Vedat Muriqi.

Tani drejtuesit e klubit nga Stambolli ëndërrojnë një repart sulmues spektakolar, me Rafael Leaon përkrah Vedat Muriqit.

Leao do të mungojë në miqësoren e Milanit kundër Celtic më 25 korrik. Ai pritet t’i bashkohet skuadrës së Rubén Amorimit në Australi më 29 korrik, së bashku me bashkëkombësin Gonçalo Ramos.

Pyetja është nëse deri atëherë Leao do të vazhdojë të jetë pjesë e Milanit, apo do të ketë pranuar të bëhet shok skuadre me Vedat Muriqin në Stamboll.