Manaj shkëlqen me dy gola dhe një asist, Sivasspori fiton me “firmë” shqiptare!

Rey Manaj ishte protagonisti kryesor i fitores 4–1 të Sivassporit ndaj Pendiksporit, më 9 tetor, në javën e nëntë të Ligës së Parë turke. Sulmuesi i Kombëtares shqiptare realizoi dy gola, duke hapur rrugën drejt një suksesi të rëndësishëm për skuadrën e tij.

Manaj zhbllokoi rezultatin në minutën e 21-të dhe goditi sërish në të 55-tën, duke dyfishuar epërsinë. Kontributi i tij vazhdoi edhe me asistin për shqiptarin tjetër të Sivassporit, Valon Ethemin, i cili shënoi golin e tretë në minutën e 64-t. Dy gola dhe një asist: një paraqitje vendimtare e bomberit kuqezi!

Ethemi i dha edhe më shumë ngjyrë shqiptare kësaj fitoreje. Pas golit të tij, Salih Kavrazlı shënoi për 4–0, ndërsa Pendikspori realizoi golin e vetëm në fund të takimit.

Manaj numëron gjashtë gola në kampionat, vetëm një më pak se Taulant Seferi, sulmuesi tjetër i Kombëtares shqiptare, i cili ka shënuar shtatë herë me Kayserisporin. Dy kuqezinj që po spikatin në futbollin turk dhe po mbajnë gjallë konkurrencën në garën e golashënuesve.

Manaj dhe Seferi me golat e tyre, Ethemi me kontributin në suksesin e Sivassporit: futbollistët shqiptarë vazhdojnë të lënë gjurmë në Turqi. Për tifozët kuqezinj, dëshira është që kjo formë të shoqërohet me të njëjtën forcë edhe me fanellën e Kombëtares!