Mohamed Salah drejt Beşiktaşit, marrëveshja në detajet e fundit

Transferimi i Mohamed Salah te Beşiktaşi me parametër zero ka hyrë në fazën përfundimtare. Për afrimin e yllit egjiptian ka këmbëngulur fort trajneri i ri i klubit turk, Vincenzo Italiano.

Salah u largua si futbollist i lirë nga Liverpooli, pasi ndërpreu para kohe kontratën për shkak të mosmarrëveshjeve të forta me trajnerin Arne Slot. Sulmuesi egjiptian ka vendosur ta vazhdojë karrierën në futbollin evropian, duke refuzuar oferta nga Arabia Saudite me vlerë mbi 20 milionë euro në sezon.

Shifrat dhe detajet e marrëveshjes

Ngadalësimi i negociatave gjatë ditëve të fundit lidhej vetëm me komisionin e lartë të kërkuar nga menaxheri i futbollistit, Ramy Abbas. Fillimisht, përfaqësuesi i Salahut pretendonte një pagesë prej 7.5 milionë eurosh.

Në orët e fundit, kjo pengesë është kapërcyer pas tërheqjes së pjesshme të stafit të egjiptianit. Kjo i ka mundësuar presidentit të Beşiktaşit, Serdal Adalı, të paraqesë ofertën përfundimtare:

Paga: rreth 10–12 milionë euro neto në sezon. Bonuset: afërsisht 2 milionë euro, të lidhura me objektivat sportivë dhe paraqitjet individuale. Kohëzgjatja: kontratë deri në vitin 2027, ose marrëveshje njëvjeçare me mundësi rinovimi automatik edhe për një sezon tjetër.

Avokati i Mohamed Salahut ka mbërritur tashmë në Stamboll për të përfunduar detajet burokratike dhe për të organizuar vizitat mjekësore përpara nënshkrimit të kontratës.

Afrimi i një ylli botëror si Salah pritet t’i shërbejë Vincenzo Italianos edhe si një “magnet” në merkato. Drejtuesit e Beşiktaşit synojnë ta shfrytëzojnë këtë goditje të madhe për të bindur një tjetër emër të rëndësishëm, ish-sulmuesin e Juventusit, Dušan Vlahović, që t’i bashkohet projektit të klubit turk.