Napoli nxjerr Lukakun në merkato, agjenti: “Nuk mund të jetë zgjedhje e dytë”

Federico Pastorello, agjenti i 33-vjeçarit, foli për të ardhmen e klientit të tij dhe për mundësinë që ai të qëndrojë si sulmuesi i dytë i Napolit.

“Lukaku mund të pranojë rolin e zëvendësuesit? Sigurisht që jo. Romelu është një futbollist i jashtëzakonshëm dhe e ka dëshmuar këtë. Ai është një nga sulmuesit më të mirë dhe më produktivë në botë. Vështirë se mund ta pranojmë një situatë të tillë”, deklaroi Pastorello për Sky Sport.

Agjenti pranoi se në fillim të sezonit mund të ekzistojnë hierarki të caktuara, por theksoi se fusha duhet të jetë ajo që jep verdiktin përfundimtar.

“Pas deklaratave të drejtorit sportiv Manna mund të ketë edhe arsye financiare. Napoli ka në skuadër një tjetër sulmues të rëndësishëm si Højlund, pa harruar rikthimin e Lucca-s. Kjo situatë ka krijuar një lloj ngërçi. Aktualisht merkatoja është pothuajse e bllokuar dhe ende nuk ka nisur lëvizja e sulmuesve kryesorë, e cila zakonisht shkakton një efekt domino.”

Pastorello foli edhe për mundësinë e uljes së pagës apo zgjatjes së kontratës së Lukakut.

“Zgjatja e kontratës sjell edhe kosto të tjera, nuk bëhet fjalë vetëm për shpërndarjen e pagës në më shumë vite. Romelu e ka fituar këtë nivel page falë asaj që ka bërë gjatë karrierës së tij. Ndoshta ende nuk ka ardhur momenti për ta reduktuar atë.”

Sipas agjentit, Lukaku nuk do ta pranonte qëndrimin në një ambient ku nuk ndihet më i dëshiruar.

“Sezoni i fundit nuk ishte vetëm përgjegjësi e tij. Nëse do të ishte lejuar të stërvitej atje ku dëshironte, ndoshta do të ishte rikthyer më herët dhe do të zhvillonte një Botëror si protagonist, megjithëse gjithsesi tregoi vlerat e tij. Romelu nuk është një djalë që qëndron aty ku nuk e duan. Strategjia e një klubi mund të jetë e drejtë, por edhe lojtari duhet të marrë vendimin e tij.”

Napoli kërkon oferta

Napoli e ka vendosur zyrtarisht Lukakun në merkato. Pas paraqitjeve të mira si zëvendësues në Kupën e Botës 2026, drejtuesit e klubit dhe presidenti Aurelio De Laurentiis zhvilluan një takim vendimtar me Pastorellon.

Klubi i kërkoi sulmuesit të pranonte një ulje të konsiderueshme të pagës për të reduktuar shpenzimet. Lukaku e refuzoi propozimin dhe palët arritën në përfundimin se largimi gjatë verës do të ishte zgjidhja më e përshtatshme.

Klubet e interesuara

New York City FC ka shfaqur interes konkret për ta transferuar belgun në MLS si lojtar të përcaktuar, “Designated Player”. Vetë Lukaku ka folur pozitivisht më parë për mundësinë e vazhdimit të karrierës në Shtetet e Bashkuara.

Beşiktaş ka nisur gjithashtu negociatat. Napoli kërkon rreth 10 milionë euro, ndërsa klubi turk synon ta mbyllë marrëveshjen për afro 5 milionë.

Ajax dhe Monaco kanë kërkuar informacion, por pengesa kryesore mbetet paga e lartë e sulmuesit. Shumica e klubeve evropiane do të kërkonin një reduktim të ndjeshëm të saj.

Lukaku ka kontratë me Napolin deri në qershor 2027 dhe përfiton rreth 6 milionë euro neto në sezon. Ai u transferua nga Chelsea në verën e vitit 2024 për 30 milionë euro. Klubi anglez zotëron 30% të shumës së një shitjeje të ardhshme, me një vlerë minimale prej 15 milionë eurosh.

Me fanellën e Napolit, sulmuesi belg ka regjistruar 45 paraqitje, 15 gola dhe 11 asistime, duke fituar edhe titullin kampion të Italisë.