Peruja ndjek futbollin, ashtu si dikur Shqipëria: "Haalandmania" pushton emrat e të porsalindurve

Futbolli vazhdon të ndikojë jo vetëm në fushë, por edhe në jetën e përditshme të njerëzve. Një shembull i veçantë vjen nga Peruja, ku performancat fantastike të sulmuesit norvegjez Erling Haaland në Kupën e Botës 2026 kanë krijuar një fenomen të pazakontë.

Sipas të dhënave zyrtare të Regjistrit Kombëtar Civil të Perusë (RENIEC), 468 të porsalindur janë regjistruar me emrin "Haaland", ndërsa 91 foshnja kanë marrë emrin e plotë "Erling Haaland".

Ky fenomen, që mediat peruane e kanë pagëzuar "Haalandmania", shpërtheu pas paraqitjeve mbresëlënëse të Norvegjisë, e cila arriti për herë të parë në historinë e saj deri në çerekfinalet e Kupës së Botës.

Një traditë që vazhdon

Peruja ka një traditë të gjatë në vendosjen e emrave të sportistëve të famshëm tek fëmijët.

Sipas statistikave të RENIEC, në vend jetojnë mijëra persona me emra të frymëzuar nga ikonat e futbollit botëror:

Neymar – 33,809 persona Messi – 3,402 Lamine Yamal – 1,241 Cristiano Ronaldo – 1,185

Futbolli është bërë pjesë e identitetit kulturor të shumë familjeve peruane, të cilat shpesh zgjedhin emra që lidhen me idhujt e tyre sportivë.

Një histori që u përjetua edhe në Shqipëri

Ky fenomen nuk është aspak i panjohur për shqiptarët.

Në fillim të viteve '90, pas rënies së komunizmit dhe hapjes së Shqipërisë ndaj botës, shumë familje shqiptare nisën t'u vendosnin fëmijëve emrat e futbollistëve më të famshëm të kohës.

Në atë periudhë ishin në modë yjet e Italisë, Brazilit dhe Gjermanisë, kombëtare që dominonin futbollin botëror.

Në shumë qytete shqiptare u shfaqën emra si Roberto, Franco, Paolo, Lothar, Jürgen, Rudi, Ronaldo, Romario, Bebeto, Dunga, Baggio, Maldini, Matthäus, Klinsmann dhe shumë të tjerë, të frymëzuar nga idhujt e Kupave të Botës dhe Kampionateve Europiane.

Për shumë prindër, futbolli nuk ishte thjesht sport, por një simbol i lirisë dhe i lidhjes me Perëndimin.

Futbolli që lë gjurmë brez pas brezi

Sot është Erling Haaland ai që frymëzon prindërit në Peru, ashtu si dikur ishin Armando (Maradona), Roberto (Baggio) , Ronaldo, Romario apo Matthäus për shumë familje shqiptare.

Edhe pse ndajnë kontinente dhe kultura të ndryshme, Peruja dhe Shqipëria kanë një ngjashmëri të bukur: pasioni për futbollin është aq i madh, sa shpesh vazhdon të jetojë edhe në emrat e brezave të rinj. Kjo tregon se heronjtë e futbollit nuk mbeten vetëm në stadiume, por bëhen pjesë e historisë familjare dhe identitetit të një shoqërie.