Rivelino rikthen kujtimet e Meksikë 1970: “Finalja me Italinë ishte ndeshja më e lehtë”

Legjenda e futbollit brazilian, Roberto Rivelino, ka rikthyer në kujtesë një nga momentet më të lavdishme të historisë së futbollit botëror, triumfin e Brazilit në Kupën e Botës 1970 në Meksikë. Në një intervistë për FIFA-n, ish-mesfushori ka rrëfyer emocionet e atij turneu historik, mbështetjen e jashtëzakonshme të tifozëve meksikanë dhe finalen e paharrueshme kundër Italisë.

Sot, larg zhurmës së stadiumeve dhe jetës së futbollit profesionist, Rivelino jeton në fshatin e qetë pranë Sao Paulos, por kujtimet e “Seleçaos” së artë vazhdojnë të jenë të gjalla.

“Përjetuam diçka të mrekullueshme në Meksikë. Qëndruam në Guadalajara gjatë gjithë turneut sepse fitonim ndeshje pas ndeshjeje. Kjo krijoi një lidhje të veçantë me qytetin dhe me njerëzit. Më pas shkuam në finalen e Aztekës, një stadium gjigant i mbushur me mbi 100 mijë tifozë”, kujton ai.

Pas eliminimit të Meksikës në çerekfinale, tifozët vendas adoptuan Brazilin si skuadrën e tyre të zemrës. Futbolli spektakolar i Pelés, Tostaos, Gersonit, Jairzinhos dhe vetë Rivelinos fitoi zemrat e publikut meksikan.

“Kur Meksika u eliminua, njerëzit filluan të mbështesnin Brazilin. Ata e dashuronin mënyrën tonë të lojës, magjinë që sillnim në fushë. Na mbështetën sinqerisht dhe kjo e bëri Kupën e Botës një spektakël të vërtetë”, shprehet ish-ylli brazilian.

Brazili fitoi të gjashta ndeshjet e turneut dhe kurora erdhi në finalen kundër Italisë. Edhe pse pjesa e parë u mbyll 1-1, me golat e Pelés dhe Boninsegnës, në pjesën e dytë brazilianët dhuruan një nga performancat më të bukura në historinë e futbollit. Gerson, Jairzinho dhe Carlos Alberto vulosën fitoren 4-1.

Në mënyrë surprizuese, Rivelino e konsideron finalen si ndeshjen më të lehtë të turneut.

“Besoni ose jo, ndeshja më e qetë dhe më e lehtë ishte finalja me Italinë. Mund të kishim shënuar edhe pesë gola. Madje në një rast po shkoja drejt golit dhe një mbrojtës më rrëzoi në zonë, por arbitri nuk dha penallti. Gjithsesi rezultati ishte 4-1 dhe ndeshja ishte praktikisht e mbyllur”, tregon ai.

Pamjet pas vërshëllimës finale mbeten ikonike edhe sot. Mijëra tifozë meksikanë pushtuan fushën e stadiumit Azteca për të festuar bashkë me kampionët e botës.

“Tifozët hynë në fushë menjëherë pas ndeshjes. Dikush i vendosi Pelés një sombrero meksikane në kokë. Ishte çmenduri e vërtetë. Tostao pothuajse mbeti vetëm me të brendshme nga tifozët që kërkonin kujtime. Ishte një skenë e pabesueshme”, kujton me buzëqeshje Rivelino.

Tashmë, pas më shumë se pesë dekadash, ish-mesfushori legjendar do të rikthehet në stadiumin që e bëri të pavdekshëm. Ai do të jetë i pranishëm në ndeshjen hapëse të Kupës së Botës 2026 në Mexico City, duke përjetuar sërish emocionet e vendit ku Brazili fitoi titullin e tretë botëror.

“Do të jetë një moment i jashtëzakonshëm. Kanë kaluar pothuajse 56 vjet dhe mezi pres të shkel sërish në atë fushë. Me të vërtetë mezi po e pres”, përfundoi Rivelino.

Meksikë 1970 mbetet ende sot simboli i futbollit spektakolar brazilian dhe i skuadrës që shumë ekspertë e konsiderojnë si më të mirën në historinë e Kupës së Botës.