Sá Pinto kritikon fushën e “Elbasan Arena”: “Ndaj Dinamos do të jetë luftë”

Trajneri i Pafos FC, Ricardo Sá Pinto, ka dalë në konferencën zyrtare për shtyp në prag të përballjes me Dinamo City, e vlefshme për fazën play-off të UEFA Conference League.

Tekniku portugez deklaroi se skuadra qipriote është e përgatitur për takimin, por shprehu pakënaqësi për gjendjen e fushës së stadiumit “Elbasan Arena”. Sipas tij, terreni duhej të ishte në kushte më të mira për një ndeshje të këtij niveli.

“Jemi gati për ndeshjen kundër Dinamos. Shqetësimi ynë i vetëm në këto momente është fusha, e cila duhej të ishte në kushte më të mira. Nuk besoj se ky terren është në nivelin e një ndeshjeje kaq të rëndësishme”, deklaroi Sá Pinto.

Trajneri i Pafos vlerësoi Dinamon si një kundërshtar të fortë dhe luftarak. Ai mendon se gjendja e terrenit mund ta favorizojë skuadrën shqiptare, e cila është e përgatitur për një lojë me shumë vrapim, duele dhe agresivitet sportiv.

“Dinamo është një kundërshtar i fortë. Sigurisht, kjo fushë mund të jetë më e përshtatshme për ta, sepse u pëlqen të vrapojnë dhe të luftojnë. Ne duhet të jemi të përgatitur për këtë lloj ndeshjeje”, theksoi tekniku portugez.

Sá Pinto pret një përballje të ashpër në Elbasan dhe u kërkon futbollistëve të tij të luajnë me inteligjencë, durim dhe qetësi. Pafos do të kërkojë të kontrollojë topin dhe ritmin e lojës, duke shmangur përfshirjen në një ndeshje të pakontrolluar.

“Për ne do të jetë një luftë. Duam të marrim një rezultat pozitiv në transfertë. Do të përpiqemi të kontrollojmë topin dhe lojën, por duhet të tregohemi të zgjuar. Ndonjëherë duhet të dish se si t’i luash këto ndeshje”, shtoi ai.

Objektivi i skuadrës qipriote është i qartë: të largohet nga Elbasani me një rezultat që do ta mbante në pozita të favorshme përpara ndeshjes së kthimit.

“Objektivi ynë kryesor është të marrim një rezultat pozitiv”, përfundoi Ricardo Sá Pinto.

Deklaratat e trajnerit të Pafos tregojnë respekt për Dinamon, por njëkohësisht rrisin temperaturën përpara një përballjeje vendimtare. “Nëndetësja” do të kërkojë të shfrytëzojë faktorin fushë dhe të hedhë hapin e parë drejt ëndrrës së madhe europiane.