Shkëndija e nis kampionatin me fitore bindëse, 3-0 ndaj Skopjes

Shkëndija e hapi sezonin e ri në mënyrën më të mirë të mundshme, duke triumfuar 3-0 ndaj Skopjes në ndeshjen e javës së parë të Ligës së Parë të Futbollit të Maqedonisë së Veriut.

Për shkak të rikonstruksionit të stadiumit në Tetovë dhe dënimit me dy ndeshje pa praninë e publikut, kuqezinjtë luajtën si vendas në kompleksin e FFM-së në Shkup.

Skuadra e Artim Pollozhanit dominoi që nga minutat e para, duke krijuar një numër të madh rastesh për shënim.

Zejnullai arriti ta dërgonte topin në rrjetë, por goli u anulua pas ndërhyrjes së VAR-it.

Epërsia e Shkëndijës erdhi në minutën e 17-të. Portieri Naumovski ndali fillimisht goditjen me kokë të Tambës, por Ndzengue reagoi më shpejt se mbrojtja kundërshtare dhe realizoi për 1-0.

Skopje e rrezikoi vetëm një herë seriozisht portën e Shkëndijës gjatë pjesës së parë. Goditja e lirë e Nikollovskit në minutën e 31-të përfundoi jashtë kuadratit.

Edhe pas pushimit, kuqezinjtë vazhduan ta kontrollonin lojën dhe të diktonin ritmin.

Goli i dytë erdhi në minutën e 65-të. Pas goditjes së Tambës, topi u përplas fillimisht në shtyllë dhe më pas në shpinën e portierit Naumovski, përpara se të përfundonte në rrjetë. Realizimi u regjistrua si autogol i portierit të Skopjes.

Në minutën e 75-të, Spahiu depërtoi bukur nga krahu dhe shërbeu për mesfushorin brazilian Rafa, i cili shënoi golin e tij të parë me fanellën e Shkëndijës dhe vulosi rezultatin 3-0.

Kuqezinjtë patën mundësinë të shënonin edhe golin e katërt në fundin e takimit, por Besart Ibraimi nuk arriti ta kthente në gol goditjen nga pika e penalltisë.

Shkëndija e nis kështu kampionatin me tri pikë plotësisht të merituara, ndërsa tani i gjithë fokusi zhvendoset te përballja evropiane me NK Bravon.

Artim Pollozhani: “Fitore e rëndësishme, por duhet të përmirësojmë ritmin”

Pas ndeshjes, trajneri Artim Pollozhani vlerësoi rezultatin dhe paraqitjen e skuadrës, por theksoi se ka ende elemente që duhen përmirësuar.

“Ishte ndeshja e parë e kampionatit dhe është shumë e rëndësishme ta nisësh sezonin me fitore. Jam i kënaqur që fituam 3-0, por në disa momente nuk ishim në nivelin dhe ritmin që kërkojmë.”

Pollozhani pranoi se angazhimet evropiane nuk i kanë lënë stafit teknik shumë kohë për ta analizuar kundërshtarin.

“Kishim vështirësi, sepse nuk patëm shumë kohë për ta analizuar Skopjen. Nga ndeshjet miqësore nuk mund të nxjerrësh gjithmonë përfundime të sakta për mënyrën se si do të luajë kundërshtari në kampionat.”

Trajneri kërkoi më shumë saktësi nga skuadra në zonën përpara portës.

“Duhet të vazhdojmë të punojmë në fazën sulmuese, në lëvizjet pa top dhe në konkretizimin e rasteve. Kundër skuadrave më të forta, çdo mundësi e humbur mund të kushtojë shumë.”

Pollozhani e lidhi këtë aspekt edhe me humbjen 2-1 në ndeshjen e parë kundër NK Bravos, ku Shkëndija krijoi raste, por nuk arriti t’i shfrytëzonte.

“Në ndeshjen e parë me Bravon krijuam shumë mundësi, por nuk i konkretizuam dhe kjo na kushtoi. Sot, fatmirësisht, shënuam tri herë. Ky është një sinjal pozitiv, por duhet të punojmë që të jemi edhe më të qartë dhe efikasë.”

Vëmendja kthehet te NK Bravo

Shkëndija tani duhet ta lërë pas kampionatin dhe të përqendrohet plotësisht te ndeshja e kthimit kundër NK Bravos në raundin e dytë kualifikues të UEFA Conference League.

Kuqezinjtë duhet të përmbysin humbjen 2-1 të ndeshjes së parë në Slloveni.

Ndeshja e radhës

Shkëndija – NK Bravo Shkup | 30 korrik 2026 | Ora 20:00

Shkëndija–Skopje 3-0 (1-0)

Stadiumi: Kompleksi i FFM-së, Shkup Gjyqtar: Dimitar Pileshkov, Shtip Golashënues: Ndzengue 17’, Naumovski 65’ (autogol), Rafa 75’

Shkëndija: Amzai, Trumçi, Fetai, Meliqi, Dimoski, Rafa, Zejnullai (kapiten, Gjeorgjievski 77’), Krasniqi (Islami 73’), Tamba (Kërstevski 73’), Kryeziu (Spahiu 61’), Ndzengue (Ibraimi 61’).

Trajner: Artim Pollozhani

Skopje: Naumovski (kapiten), Gjurkovski, Angelov (Papaliski 71’), Cvetkovski (Daci 82’), Sekovski (Slavkov 82’), Ramadani, Nikollovski, Trajçevski, Mlladenovski, Poposki, Bozhinovski (Beroviq 71’).

Trajner: Muarem Muarem