Shkëndija i tregon Vardarit se kush është kampioni, triumfon 0-2 në Shkup

Shkëndija ka treguar forcën e kampiones në derbin kundër Vardarit, duke triumfuar 0-2 në Shkup dhe duke regjistruar fitoren e dytë në po aq ndeshje të kampionatit.

Kuqezinjtë nga Tetova vuajtën gjatë pjesës së parë, por ndryshuan ritëm pas pushimit dhe morën plotësisht kontrollin e takimit.

Protagonisti absolut ishte Fabrice Tamba, i cili u aktivizua në minutën e 46-të dhe ndryshoi menjëherë historinë e ndeshjes.

Vetëm gjashtë minuta pas hyrjes në fushë, sulmuesi i krahut zhbllokoi rezultatin, duke kaluar Shkëndijën në epërsi.

Tamba goditi përsëri në pjesën e dytë, duke realizuar golin e dytë personal dhe duke vulosur suksesin 0-2 të kampionëve.

Pas ndeshjes, heroi kuqezi pranoi se temperaturat e larta e kishin vështirësuar shumë takimin.

“Ishte një ndeshje e vështirë për shkak të kushteve klimatike, pasi ishte shumë nxehtë. Në pjesën e dytë u futëm me një mentalitet tjetër. Hymë në fushë dhe u treguam se dëshironim ta fitonim ndeshjen. Këtë edhe bëmë”, deklaroi Tamba.

Sulmuesi përsëriti historinë e dy sezoneve më parë, kur gjithashtu kishte shënuar në paraqitjen e tij të parë pikërisht kundër Vardarit.

Megjithatë, ai kërkoi që skuadra të qëndrojë me këmbë në tokë dhe të mos përfshihet nga entuziazmi.

“Nuk do të thosha se Vardari është një skuadër që më përshtatet në mënyrë të veçantë. Hyra në fushë dhe tregova qëndrimin që kërkoi trajneri dhe që të gjithë prisnin nga unë. Jam shumë i lumtur që shënova dy gola, por tani duhet të qëndrojmë të përulur dhe të fokusohemi te ndeshja e së enjtes.”

Fitorja në derbi vjen në momentin e duhur për Shkëndijën, e cila tashmë e zhvendos të gjithë vëmendjen te sfida e rëndësishme evropiane.

Tamba theksoi se mbështetja e tifozëve kuqezi do të jetë vendimtare në përballjen e radhës.

“Duhet të jemi shumë të fortë mendërisht dhe kemi nevojë për të gjithë. Sot nuk patëm mundësi t’i kishim tifozët tanë me ne, por të enjten ata do të jenë pranë nesh. Ne do të japim maksimumin. Kjo fitore do të na ndihmojë shumë.”

Me gjashtë pikë të plota pas dy javëve të para, Shkëndija e nis sezonin në mënyrën më të mirë dhe u dërgon një paralajmërim të qartë rivalëve.

Kampionët janë sërish të fortë, të uritur për suksese dhe të gatshëm për të luftuar për një tjetër titull në Maqedoninë e Veriut.