Shuhet Shpëtim Gazheli, legjenda e pingpongut shqiptar dhe “Mjeshtër i Sportit”

Pingpongu shqiptar ka humbur një nga figurat e tij më të shquara. Shpëtim Gazheli, legjendë e kësaj disipline dhe mbajtës i titullit “Mjeshtër i Sportit”, u nda nga jeta më 15 korrik 2026, duke lënë pas një trashëgimi të çmuar në historinë e sportit shqiptar.

Gjatë karrierës së tij të jashtëzakonshme, Gazheli u shpall plot 13 herë kampion kombëtar, në garat individuale dhe ekipore, duke qenë për vite me radhë një nga protagonistët kryesorë të pingpongut në Shqipëri.

I lidhur ngushtë me klubin historik Partizani, fillimisht si lojtar dhe më pas si trajner, ai fitoi gjithashtu 5 herë Kupën e Republikës dhe 2 herë Spartakiadën Kombëtare.

Gazheli ishte gjithashtu pjesë e Ekipit Kombëtar të Shqipërisë, duke përfaqësuar vendin në aktivitetet ndërkombëtare dhe duke dhënë kontributin e tij në afirmimin e pingpongut shqiptar.

Pas përfundimit të karrierës si sportist, Shpëtim Gazheli vijoi t'i shërbente sportit si trajner dhe mentor. Pranë Partizanit, ai edukoi dhe frymëzoi breza të tërë sportistësh të rinj, duke transmetuar jo vetëm njohuritë dhe pasionin për pingpongun, por edhe vlerat njerëzore, disiplinën dhe respektin për sportin.

Për shumë prej atyre që patën privilegjin ta njihnin dhe të punonin me të, Gazheli ishte një “profesor” i vërtetë i sportit dhe i jetës.

Ndarja e tij nga jeta është një humbje e madhe për familjen, miqtë, klubin Partizani dhe të gjithë komunitetin e pingpongut dhe sportit shqiptar.

Gazeta “Elite Sport Vizion” i shpreh ngushëllimet më të sinqerta familjes Gazheli për humbjen e njeriut të tyre të dashur.

U prehtë në paqe, Shpëtim Gazheli!