Telenovela turke për Rafael Leaon vazhdon: Fenerbahçe rrit ofertën, por tani dyshimet i ka portugezi

Telenovela Rafael Leão–Fenerbahçe po hyn në një fazë vendimtare. Sipas raportimeve të fundit nga Italia, klubi turk pritet t’i paraqesë Milanit një ofertë të re zyrtare për sulmuesin portugez.

Propozimi i ri mund të mbërrijë të hënën, më 3 gusht, dhe pritet të jetë shumë më pranë kërkesave ekonomike të drejtuesve kuqezi. Megjithatë, pengesa kryesore nuk duket më marrëveshja mes klubeve, por qëndrimi i vetë futbollistit.

Fenerbahçe afrohet te kërkesa e Milanit

Milani ka kërkuar fillimisht rreth 60 milionë euro për Leaon. Por për shkak të mungesës së ofertave në këtë nivel, kuqezinjtë mund të pranojnë një marrëveshje prej afërsisht 50 milionë eurosh.

Oferta e parë e raportuar e Fenerbahçes ishte një huazim me të drejtë blerjeje, me një paketë që arrinte rreth 40–42 milionë euro. Milani e refuzoi këtë formulë, pasi dëshiron vetëm një transferim përfundimtar.

Sipas burimeve italiane, oferta e re e klubit nga Stambolli mund të arrijë në 45–46 milionë euro për kartonin e plotë të lojtarit. Diferenca me kërkesën e Milanit mund të mbulohet nëpërmjet bonuseve.

Milani kërkon të paktën 50 milionë euro, plus bonuse që mund ta çojnë vlerën përfundimtare të operacionit drejt 60 milionëve. Football Italia

Kontratë e madhe për Leaon

Fenerbahçe i ka paraqitur agjentit Jorge Mendes një ofertë të rëndësishme për futbollistin: kontratë katërvjeçare me pagë prej tetë milionë eurosh në sezon, plus rreth dy milionë euro bonuse.

Këto shifra janë më të larta se paga aktuale e portugezit në Milano, por ende nuk kanë mjaftuar për ta bindur Leaon të japë miratimin përfundimtar.

Champions League, pengesa kryesore

Dyshimet e Leaos nuk lidhen kryesisht me aspektin ekonomik, por me projektin sportiv. Sulmuesi nuk është plotësisht i bindur për kalimin në kampionatin turk, veçanërisht sepse Fenerbahçe nuk e ka ende të garantuar pjesëmarrjen në fazën kryesore të Champions League.

Për Leaon, mundësia për të luajtur në kompeticionin më të rëndësishëm europian mbetet një kusht vendimtar. Pikërisht për këtë arsye, Galatasaray mund të përfaqësojë një alternativë më tërheqëse, pasi e ka të siguruar pjesëmarrjen në Champions.

Duhet theksuar se Fenerbahçe më 25 korrik mohoi publikisht lajmet për një paketë prej 100 milionë eurosh për transferimin dhe pagën e Leaos. Megjithatë, raportimet italiane vazhdojnë të flasin për kontakte dhe për një ofertë të re shumë më të ulët.

Tashmë Fenerbahçe duket gati të afrohet me kërkesat e Milanit, por për ta përfunduar transferimin duhet të fitojë betejën më të vështirë: të bindë Rafael Leaon se e ardhmja e tij duhet të jetë në Stamboll.