Teuta mbretëron në Kurbin, Kallaku udhëheq “Djemtë e Detit” drejt fitores së dytë!

Teuta ka regjistruar një fitore të rëndësishme në javën e tretë të “Abissnet Superiore”, duke mposhtur 3–1 Laçin në Kurbin.

Skuadra e drejtuar nga Edlir Tetova ishte më konkrete përpara portës dhe i dha drejtim ndeshjes që në minutat e para. Sherif Kallaku ishte protagonisti kryesor me një gol dhe një asist, duke merituar edhe çmimin si lojtari më i mirë i takimit.

Dy gola në 12 minutat e para

Teuta e nisi ndeshjen me ritëm të lartë dhe kaloi në avantazh që në minutën e nëntë. Sherif Kallaku u tregua i saktë nga pika e bardhë, duke dërguar topin në rrjetë për rezultatin 0–1.

Vetëm tri minuta më vonë, Votlai realizoi golin e dytë dhe i dha skuadrës durrsake një epërsi të rëndësishme.

Laçi fitoi mundësinë për t’u rikthyer në lojë në minutën e 39-të, por Bernardoni u shndërrua në heroin e Teutës. Portieri priti penalltinë e ekzekutuar nga Bibo dhe ruajti avantazhin e dyfishtë deri në pushim.

Bibo rihap ndeshjen, Pedro mbyll llogaritë

Në pjesën e dytë, Laçi u përpoq të rriste presionin dhe arriti ta ngushtonte diferencën në minutën e 64-t. Bibo korrigjoi gabimin e penalltisë dhe shënoi golin e rezultatit 1–2.

Vendasit kërkuan barazimin, por Teuta administroi epërsinë dhe goditi sërish në fund. Në minutën e 89-të, Pedro realizoi një gol të bukur, duke vulosur rezultatin përfundimtar 1–3.

Për Teutën ishte fitorja e dytë radhazi në kampionat, pas suksesit 3–1 ndaj Tiranës.

Kallaku, gol, asist dhe çmimi i më të mirit

Sherif Kallaku ishte një nga protagonistët absolutë të fitores së Teutës. Mesfushori shënoi nga pika e bardhë, kontribuoi me një asist dhe u shpall lojtari i ndeshjes.

Pas takimit, ai foli edhe për “premion personale” të vendosur nga trajneri Edlir Tetova për futbollistët e skuadrës.

“Duke iu referuar ndeshjes së kaluar, Pedro ka marrë një premio personale nga trajneri Tetova. Sot kisha dëshirë ta merrja unë, por nuk arrita ta realizoja”, deklaroi Kallaku për “RTSH Sport”.

Mesfushori shprehu gjithashtu kënaqësinë për rikthimin në Durrës, ku ndodhet edhe familja e tij.

“Jam i lumtur që jam pjesë e Teutës. Kam insistuar vetë të jem pjesë e këtij projekti, edhe për faktin se familjen e kam në Durrës. Jam shumë, shumë i lumtur. Besoj se kemi një ekip të mirë dhe mund të kemi një ecuri pozitive”, tha ai.

Tetova: “Rezultatit i vendos notën 10”

Trajneri Edlir Tetova pranoi se priste një futboll më të bukur nga të dyja skuadrat, por kushtet e fushës ndikuan në cilësinë e lojës.

“Për emrin e skuadrave dhe kushtet që prisnim, mendoja se të dyja ekipet do të zhvillonin një futboll më të bukur. Laçi kishte treguar lojë të mirë në dy ndeshjet e para. Cilësia e fushës na penalizoi disi, por rezultatit do t’i vendosja notën 10, sepse në fund ai është që të kënaq”, deklaroi Tetova.

Sipas tij, Teuta kishte mundësi ta mbyllte më shpejt takimin, veçanërisht pas dominimit në pjesën e parë.

“Duhej ta mbyllnim ndeshjen që në pjesën e parë. Kishim manovër dhe thellësi në krahun e djathtë, ishim depërtues dhe duhej ta zgjidhnim më shpejt. Cilësia e fushës ishte e dobët për të dyja skuadrat.”

“Nuk më pëlqen të mbrohemi shumë”

Tekniku i durrsakëve tregoi se u kishte kërkuar lojtarëve të fitonin duelet individuale, por nuk mbeti plotësisht i kënaqur me tërheqjen e skuadrës në disa momente.

“U kam kërkuar lojtarëve të jemi një kundër një, sidomos pas tërheqjes. Nuk më pëlqen të qëndrojmë shumë në mbrojtje, por këto janë gjëra që do të provohen ndeshje pas ndeshjeje. Edhe kundër Tiranës vepruam kështu, por ishim më shumë ofensivë”, shpjegoi Tetova.

Trajneri vlerësoi edhe mënyrën e lojës së Laçit, duke pranuar se priste një paraqitje më cilësore nga të dyja skuadrat.

“Lojtarët tanë kërkonin ndihmë më poshtë. Cilësia e lojës ishte e dobët dhe gabuan futbollistët e të dyja skuadrave. Laçi luajti futboll, por jam i kënaqur me djemtë e mi.”

Bernardoni, pritje me vlerën e një goli

Një moment vendimtar ishte penalltia e pritur nga Bernardoni në minutën e 39-të. Nëse Bibo do të kishte shënuar, Laçi mund ta kishte rihapur ndeshjen përpara përfundimit të pjesës së parë.

“Në një ditë të keqe dhe në një terren të vështirë duhet të dish ta mbrosh portën. Patëm mundësi të kalonim në 0–3, por nuk e realizuam. Na ndihmoi shumë edhe pritja e Bernardonit”, nënvizoi Tetova.

Projekti i Tetovës dhe besimi tek akademia

Trajneri i Teutës kërkon kohë për ta zbatuar plotësisht idenë e tij të lojës. Sipas tij, skuadra është bashkuar rreth projektit, por do të ketë ulje-ngritje gjatë procesit.

“Kur merr një ekip të ri, ka një kurbë zhvillimi, me ndeshje të mira dhe të dobëta. Ajo që më pëlqen është se djemtë janë bashkuar me mua. Dua ta përcjell idenë time te lojtarët”, tha Tetova.

Ai shtoi se mungojnë tre futbollistë dhe se pushimi i kampionatit për ndeshjet e Kombëtares do t’i japë më shumë kohë skuadrës për të punuar.

“Me pushimin e Kombëtares do të kemi më shumë kohë që lojtarët të futen në stërvitje. Objektivi ynë është që brenda katër viteve futbollistët e akademisë të bëhen lojtarë kryesorë të ekipit.”

Misteri i “premios personale”

Tetova nuk dëshiroi ta zbulonte plotësisht formulën e premios individuale, por konfirmoi se ajo lidhet me mënyrën se si lojtarët bashkëpunojnë dhe pasojnë topin.

“Nuk dua të zbuloj shumë për këtë pjesë. Lojtarët kanë premio personale kur pasojnë topin. Ka kritika nga ana ime, por ka edhe një stimul shtesë”, shpjegoi trajneri.

Teuta bind me rezultate

Pas triumfit ndaj Tiranës, Teuta konfirmoi momentin pozitiv edhe në Kurbin. Skuadra durrsake tregoi efikasitet, karakter dhe aftësi për të vuajtur në momentet kur Laçi ushtroi presion.

Kallaku mori skenën me golin dhe asistin e tij, Bernardoni bëri diferencën nga pika e bardhë, ndërsa Votlai dhe Pedro plotësuan një fitore që forcon besimin te projekti i Edlir Tetovës.