Trump kërkon që Gianni Infantino të bëhet Sekretar i Përgjithshëm i OKB-së pas Kupës së Botës

Presidenti Donald Trump dëshiron që presidenti i FIFA-s, Gianni Infantino, të jetë Sekretari i ardhshëm i Përgjithshëm i Kombeve të Bashkuara, sipas informacioneve të siguruara nga gazeta New York Post.

Infantino, 56 vjeç, krijoi një marrëdhënie të afërt me Trumpin gjatë organizimit të Kupës së Botës të këtij viti. Drejtuesi i futbollit botëror, i lindur në Zvicër, bëri përpjekje të shumta për ta përfshirë dhe vlerësuar presidentin amerikan, duke i dhënë atij në dhjetor edhe Çmimin e parë të Paqes të FIFA-s.

Një burim pranë presidentit i tha gazetës se Trump beson se Infantino “respektohet nga të gjithë në mbarë botën dhe ka një aftësi të veçantë për t’i bashkuar njerëzit”.

Ende nuk është e qartë nëse Infantino është i interesuar për këtë detyrë dhe deri në çfarë mase Trump e ka diskutuar këtë mundësi drejtpërdrejt me të.

Megjithatë, presidenti amerikan mendon se ekziston një hapësirë e qartë mes kandidatëve aktualë, të cilët një person i brendshëm i përshkroi si shtatë kandidatura “të dobëta”.

Kandidatët e tjerë

Mes kandidatëve më të njohur janë ish-presidentja socialiste e Kilit, Michelle Bachelet, e cila mund të përballet me kundërshtimin e Shteteve të Bashkuara, dhe argjentinasi Rafael Grossi, drejtor i përgjithshëm i Agjencisë Ndërkombëtare të Energjisë Atomike.

Kandidatura e Grossit mund të ngrejë shqetësime në Mbretërinë e Bashkuar për shkak të mosmarrëveshjes së vazhdueshme me Argjentinën mbi Ishujt Falkland, të njohur nga argjentinasit si Malvinet.

Ideja e Trumpit do ta ndryshonte pritshmërinë se drejtuesi i ardhshëm i OKB-së duhet të vinte nga Amerika Latine ose Karaibet. Përfaqësuesi i fundit i këtij rajoni në këtë post ishte peruani Javier Pérez de Cuéllar, i cili shërbeu nga viti 1982 deri më 1991.

Megjithatë, disa burime thonë se ky rotacion jozyrtar gjeografik nuk do ta përjashtonte domosdoshmërisht Infantinon. Ekziston gjithashtu mundësia që ai të siguronte nominime të tjera, përveç mbështetjes së Trumpit.

“Vetëm Trumpi mund të kishte një ide të tillë”

Paolo Zampolli, biznesmeni dhe diplomati italo-amerikan që shërben si i dërguari i posaçëm i Trumpit për partneritetet globale, deklaroi për New York Post se “vetëm presidenti Trump mund të kishte një ide kaq gjeniale”.

Sipas Zampollit, Infantino “do të bënte një punë shumë të mirë” dhe “pëlqehet nga të gjithë”. Ai beson se presidenti i FIFA-s mund t’i sillte energji të re burokracisë së madhe të Kombeve të Bashkuara dhe ta përdorte sportin për të ndërtuar ura të reja e për të frymëzuar të rinjtë dhe popullsitë e varfra në mbarë botën.

“Ka disa ngjashmëri” mes detyrës së presidentit të FIFA-s dhe asaj të Sekretarit të Përgjithshëm të OKB-së, tha Zampolli, i cili është mik personal i Infantinos dhe ish-ambasador në Kombet e Bashkuara për shtetin e vogël ishullor të Dominikës.

“Në Kombet e Bashkuara duhet të bashkëpunosh me 193 shtete anëtare. Në FIFA janë mbi 200 anëtarë dhe bilanci i shkëlqyer i Giannit tregon se ai di si të drejtojë”, shtoi ai.

Zampolli kaloi kohë me Infantinon gjatë finales së Kupës së Botës në Nju Xhersi, fundjavën e kaluar. Megjithatë, ai tha se nuk e diskutuan këtë ide dhe se ishte i befasuar kur mësoi për të nga New York Post.