Vajzat Kuqezi Nisin Misionin për Botërorin 2027 – Shqipëria Gati për Sfidat Vendimtare ndaj Çekisë dhe Malit të Zi

Kombëtarja shqiptare e futbollit për vajza ka nisur zyrtarisht përgatitjet për dy ndeshjet e fundit kualifikuese të Botërorit 2027, që do të jenë vendimtare për fatin e skuadrës kuqezi në Grupin B1 të Ligës B. Nën drejtimin e trajnerit Armir Grima, ekipi është grumbulluar në Shkodër, aty ku zhvilloi edhe seancën e parë stërvitore në prag të përballjeve ndaj Çekisë dhe Malit të Zi.

Atmosfera në kampin kuqezi është pozitive dhe plot përkushtim, ndërsa stafi teknik ka nisur menjëherë punën për rikthimin e ritmit konkurrues të skuadrës. Seanca e parë u fokusua kryesisht te përgatitja fizike dhe ushtrimet tekniko-taktike, me objektivin për të harmonizuar grupin përpara dy ndeshjeve zyrtare.

Megjithatë, trajneri Grima nuk e pati ende në dispozicion skuadrën e plotë, pasi disa futbolliste ishin të angazhuara në finalen e kampionatit shqiptar mes Vllaznisë dhe Apolonisë. Pritet që grupi të kompletohet plotësisht gjatë mbrëmjes, ndërsa nga dita e nesërme përgatitjet do të vijojnë me intensitet maksimal.

Shqipëria do të luajë fillimisht më 5 qershor në transfertë ndaj Çekisë, në një ndeshje tepër të rëndësishme që nis në orën 17:30. Katër ditë më vonë, më 9 qershor në ora 19:00, vajzat kuqezi do të zbresin në stadiumin “Loro Boriçi” për sfidën e fundit ndaj Malit të Zi, takim që pritet të ketë peshë të madhe për renditjen finale në grup.

Fushata kualifikuese e Shqipërisë ka njohur ulje-ngritje. Vajzat kuqezi e nisën në mënyrë fantastike me triumfin 2-1 ndaj Malit të Zi në transfertë, ku kapitenia Megi Doçi ishte heroine absolute me dy gola vendimtarë. Më pas, skuadra hasi vështirësi ndaj kundërshtareve më të forta të grupit, duke u mposhtur nga Çekia dhe Uellsi, por pa humbur shpirtin luftarak që ka karakterizuar ekipin gjatë gjithë rrugëtimit.

Një nga pikat më të forta të kësaj Kombëtareje mbetet bërthama e futbollisteve të Vllaznisë, të kombinuara me lojtare që aktivizohen jashtë vendit. Emra si Megi Doçi, Alma Hilaj, Ezmiralda Franja, Arbiona Bajraktari, Fortesa Berisha dhe Arbenita Curraj pritet të jenë sërish lideret e skuadrës në këto sfida vendimtare.

Përballja ndaj Çekisë shihet si mundësi për reagim dhe për të rikuperuar humbjen e ndeshjes së parë, ndërsa takimi ndaj Malit të Zi konsiderohet një “finale” për vendin e tretë në grup, objektiv që do t’i siguronte Shqipërisë qëndrimin në Ligën B dhe shanset për të vazhduar më tej në fazën “play-off”.

Në Shkodër ka nisur numërimi mbrapsht. Kombëtarja shqiptare e vajzave është gati të luftojë deri në fund për ëndrrën Botëror 2027.