Vllaznia–Partizani, Bratu kërkon kthesën: “Jemi klub i madh, duhet të marrim pikët”

Partizani do të kërkojë kthesën në transfertën e vështirë ndaj Vllaznisë. Të kuqtë kanë grumbulluar vetëm një pikë në dy ndeshjet e para dhe trajneri Florin Bratu e pranon se kjo nuk është nisja që pritej nga një klub me objektiva të mëdha.

“Është e vërtetë që kemi vetëm një pikë. Nuk është nisja që dëshironim. Ndeshja me Vllazninë është një moment shumë i rëndësishëm dhe sigurisht duhet të marrim pikë. Do të përballemi me një skuadër shumë të mirë, e cila luan fort në shtëpi. Duhet të jemi gati dhe të fokusuar”, deklaroi Bratu.

Agresivitet, por pa kartonë të kuq

Një nga shqetësimet kryesore të teknikut rumun është inferioriteti numerik me të cilin Partizani është detyruar të luajë në dy takimet e para.

“Të ruajmë ritmin tonë në seancat stërvitore, sepse kjo është shumë e rëndësishme. Duhet të jemi agresivë, por pa u ndëshkuar me kartonë të kuq. Në dy ndeshjet e para kemi luajtur për shumë minuta me një futbollist më pak dhe nuk jam aspak i kënaqur me këtë fakt”, theksoi ai.

Partizani ka realizuar vetëm një gol deri tani, por Bratu mendon se statistikat nuk e pasqyrojnë plotësisht lojën e skuadrës.

“Kemi luajtur afro 60 minuta me një lojtar më pak kundër Teutës. E njëjta situatë ndodhi edhe ndaj Laçit. Për mua ka qenë një situatë konfuze, sepse të gjitha planet e skuadrës ndryshuan. Megjithatë, duhet të improvizojmë dhe të gjejmë zgjidhjet e duhura në fazën sulmuese.”

Toma, Sidibe dhe Fadairo janë gati

Trajneri konfirmoi se Toma, Sidibe dhe Fadairo janë në dispozicion, megjithëse formacioni përfundimtar nuk është vendosur ende.

“Të gjithë janë të gatshëm dhe pjesë e grupit. Ende nuk e kam vendosur 100 për qind formacionin. Duhet të shoh edhe seancën e fundit stërvitore dhe më pas të bëj zgjedhjet e duhura. Për mendimin tim, të gjithë janë gati.”

Bratu nuk merret me episodet e Elbasanit

Vllaznia vjen në këtë përballje pas një ndeshjeje të tensionuar në Elbasan, por Bratu nuk dëshiron që skuadra e tij të shpërqendrohet nga polemikat që shoqëruan atë takim.

“Nuk kemi folur me lojtarët për atë që ndodhi në Elbasan. Episodet janë parë nga të gjithë, por mendoj se nuk është puna jonë. Ne duhet të fokusohemi te ndeshja. E dimë se do të jetë një transfertë e vështirë, por lojtarët e mi janë gati të japin gjithçka dhe të marrin pikët, sepse për ne janë shumë të rëndësishme. Jemi një klub i madh dhe prej nesh pritet shumë.”

Një kapitull i ri në “Loro Boriçi”

Fitorja e fundit e Partizanit ndaj Vllaznisë në stadiumin “Loro Boriçi” daton në vitin 2022. Megjithatë, Bratu nuk dëshiron t’u japë shumë rëndësi statistikave të së kaluarës.

“Ky është një kapitull i ri dhe një kampionat i ri. Shpresoj të japim maksimumin. Edhe Vllaznia do të ketë presion të madh pas ndeshjes me Elbasanin. Ne duhet ta menaxhojmë sa më mirë këtë situatë.”

Një lajm pozitiv për Partizanin është rikthimi i Humanit, të cilin trajneri e konsideron një element të rëndësishëm të skuadrës.

“Sigurisht, ai është një nga lojtarët tanë më të rëndësishëm. Me rikthimin e tij këtë javë kemi fituar një lojtar”, përfundoi Florin Bratu.

Përballja në Shkodër pritet të jetë një provë e fortë për të dyja skuadrat: Vllaznia kërkon të reagojë pas polemikave të Elbasanit, ndërsa Partizani synon fitoren e parë dhe shkëputjen nga nisja e dobët e sezonit.