WISSA SHKRUAN HISTORI: KONGO DR FITON PIKËN E PARË NË BOTËROR NDAJ PORTUGALISË
RD KONGO SHËNON GOLIN E PARË DHE FITON PIKËN E PARË NË BOTËROR 🇵🇹 Portugalia ndalet në Houston, Ronaldo vendos rekord tjetër në moshën 41-vjeçare.
Houston, SHBA – Republika Demokratike e Kongos shkroi një kapitull historik në FIFA World Cup 2026™, duke siguruar pikën e parë dhe golin e parë në historinë e saj në Kupën e Botës pas barazimit spektakolar 1-1 ndaj Portugalisë në Grupin K.
Ndeshja nisi në mënyrën më të mirë për portugezët. Vetëm në minutën e 6-të, mesfushori i talentuar João Neves shfrytëzoi një krosim perfekt të Pedro Neto dhe me kokë dërgoi topin në rrjetë për avantazhin 1-0 të Portugalisë.
Skuadra e drejtuar nga Roberto Martínez dominoi minutat e para, por afrikanët nuk u dorëzuan. Sulmuesi Yoane Wissa paralajmëroi me një goditje të rrezikshme pas dhjetë minutash dhe vazhdoi të ishte kërcënimi kryesor për mbrojtjen portugeze.
Kur dukej se pjesa e parë do të mbyllej me avantazhin minimal të Portugalisë, erdhi momenti historik. Në minutën e pestë shtesë, Arthur Masuaku harkoi në zonë dhe Yoane Wissa goditi fuqishëm me kokë për të realizuar golin e parë të RD Kongos në historinë e Kupës së Botës. Një moment emocionues për "Leopardët", plot 52 vite pas debutimit të tyre të vetëm në Botërorin e vitit 1974.
Në pjesën e dytë, Portugalia mendoi se kishte rikthyer epërsinë kur João Cancelo realizoi me një goditje spektakolare akrobatike, por goli u anulua për pozicion jashtë loje.
Nga ana tjetër, kongolezët vazhduan të besonin dhe krijuan raste të tjera të rrezikshme, ndërsa kapiteni portugez Cristiano Ronaldo nuk arriti të shënonte golin e tij të nëntë në histori të Kupës së Botës.
Përveç rezultatit historik, kjo ndeshje do të mbahet mend edhe për një tjetër rekord. Në moshën 41 vjeç e 132 ditë, Cristiano Ronaldo u bë lojtari më i vjetër i fushës që ka nisur ndonjëherë si titullar në një ndeshje të Kupës së Botës dhe lojtari i dytë më i moshuar që ka luajtur ndonjëherë në këtë kompeticion, pas legjendës kamerunase Roger Milla.
Çmimi Michelob Ultra Superior Player of the Match iu dha autorit të golit portugez, João Neves, i cili zhvilloi një paraqitje mbresëlënëse në mesfushë.
Barazimi lë gjithçka të hapur në Grupin K, ndërsa RD Kongo feston një nga ditët më të rëndësishme në historinë e futbollit të saj.
Portugali 1-1 RD Kongo
Golat: ⚽ João Neves 6' (Portugalia) ⚽ Yoane Wissa 45+5' (RD Kongo)
Lojtari i Ndeshjes: João Neves (Portugalia)