ZYRTARE: Kolo Muani rikthehet te Juventus, zbulohen shifrat e transferimit

Juventus ka përfunduar transferimin përfundimtar të sulmuesit francez Randal Kolo Muani nga Paris Saint-Germain.

Futbollisti 27-vjeçar mbërriti në Torino dhe iu nënshtrua kontrolleve të zakonshme mjekësore. Paris Saint-Germain ishte klubi i parë që konfirmoi zyrtarisht marrëveshjen.

Shifrat e transferimit

Juventus do të paguajë 38 milionë euro si tarifë fikse, ndërsa marrëveshja përfshin edhe 12 milionë euro bonuse të lidhura me paraqitjet dhe objektivat sportive.

Vlera e përgjithshme e operacionit mund të arrijë deri në 50 milionë euro. Sulmuesi ka firmosur një kontratë pesëvjeçare, të vlefshme deri në qershor të vitit 2031.

Njoftimi i PSG-së

“Paris Saint-Germain njofton transferimin e Randal Kolo Muani te Juventus.

Randal Kolo Muani rikthehet kështu te Juventus pas përvojës së tij të parë me fanellën bardhezi në vitin 2025.

Paris Saint-Germain e falënderon Randal Kolo Muani dhe i uron më të mirat në vazhdim të karrierës së tij”, thuhet në komunikatën e klubit francez.

Rikthim në Torino

Kolo Muani e njeh mirë ambientin e Juventusit, pasi ishte pjesë e skuadrës gjatë gjysmës së dytë të sezonit 2024–2025. Në atë periudhë, ai shënoi 10 gola në 22 paraqitje dhe ndihmoi bardhezinjtë të siguronin kualifikimin në Ligën e Kampionëve.

Pas një sezoni të kaluar në formë huazimi te Tottenham Hotspur, sulmuesi francez rikthehet në Torino, këtë herë si futbollist përfundimisht i Juventusit.

Kolo Muani mund të luajë si sulmues qendre, por edhe në të dy krahët e repartit ofensiv. Shpejtësia, lëvizshmëria dhe aftësia për të sulmuar hapësirat pritet t’i japin Juventusit më shumë alternativa në fazën sulmuese.